يـبـه
بواسطة : فرج صباح
بتاريخ : 2013-04-22 15:02:22
يبه ... وطارت قبل طلقة لساني
وألفين طلقه صابت أقراب وأجناب
كن الزمان اللي خذاك وعطاني
لا أعطى ولا أهدى في حياتي ولا جاب
يبه ... وطارت قبل طلقة لساني
وألفين طلقه صابت أقراب وأجناب
كن الزمان اللي خذاك وعطاني
لا أعطى ولا أهدى في حياتي ولا جاب
يبـه دخيلك شوف وقتي رماني
غريب صادق بالشقا كل الأغراب
اذكر كتبتـك لين حزني محانـي
واذكر قريتـك والفضا جرح وعتاب
يـبـه وأتمتم دمـع عيني غشاني
الكـل ينطقها وانا اكتب على تراب
والريــح تمسـح ماكتبت بثواني
وارجع اشخبط ما كتبته على باب
يبه ولا ني قلتها لـك ولاني
اللي نساها يوم قلت الزمن طاب
والوقـت لا اقفى وش تفيد الأماني
طبع الأماني لا اقبلت ماتبي أسباب
مليوووون مرة قلت حزني عشاني
لين امتلى كاسي من الهم ... وإنساب
ما كن لي قلبٍ وجسمي حواني
لكن لي قلب احتوى جسم وارتاب
يتيم ... وش له بالغلا والأغاني
وحيد ما يغريه من حوله احباب
يتيم يزرع طيبته بالمحاني
يصير حظه من ردى الوقت حطاب
كبرت أكثر من جميع المعاني
حزنت .. كني ذنب عنه الفرح تاب
واللي نسى معذور لو هو نساني
لو ما تعذر طيبتي عذر وأسباب
شفني كبرت ولا نطقها لساني
أغـار لا قالوا «يبه» بعض الأصحاب....!!