غياب الافراح
اقبلت بعد غياب الافراح واعطيت
قلبي تباشير الفرح والسعاده
عيشتني حلم واماني وتليت
قلبي لجوك واستلبت الاراده
ليتك قبل تغزو لاحاسيس وتبيت
داخل عروقي جيت خذت الافاده
عن خافقٍ يا كم تعنى وانا ازريت
اعيشه تحت الضلوع ابهواده
وعن دنيتٍ ما جت على ما تمنيت
ولاذقت منها غير هم ونكاده
ويوم اشرقت شمسك بجوي تهنيت
وتبسمت روحي على غير عاده
احييت شي مات مبطي وجريت
من داخل الذكرى لحون الاباده
اخذتني مني وانا قمت واعطيت
طيفك واحاسيسي زمام القياده
قلبٍ نبض بك كان قبل اعرفك ميت
لا سره الواقع ولا الحلم فاده
طال انتظاره تحت جدران يا ليت
يحلم عسى الاحلام تبلغ مراده
وعقب استقر الياس بالقلب مريت
وقدمت لي شرب التفائل وزاده
مشكورياللي في ظلالك تفيت
من لاهب الحظ الردي وعناده