قلب ما حقّق طموحك قص عرقه واقبره
بواسطة : صلاح الشمريبتاريخ : 2013-02-08 01:59:27
انفطر قلبي وبان اللي بجوفه وانكشف 
انكشف حبٍّ عن المحبوب قلبي يستره
افضحتني عبرةٍ في جوف صدري ترتجف
حشرجتها تكتم انفاسي بوسط الحنجره
من كثر خوفي عليه الدمع من عيني ذرف
قدمها مهرة شعوري بالهوى متقنطره
كل يوم انطر قدوم الليل في شوق وشغف
وارتمي لامن لقيته بين صدره وانحره
كل شي انساه معه ابدون قصد ولاكلف
لو زمنا غارسٍ في وسط صدري خنجره
اتحمّل لجل ما ضايقه واغض الطرف
وانكسرله لجل ما ضايق شعوره واكسره
انكساري كبرياء وحب واحساس وعطف
حمل كايد والجمل لو ينقله قص ظهره
الهوى سيلٍ عرم واللي بدربه ينجرف
سيل لو مهما نسوّي صعبٍ انّا نعبره
من مشى درب الهوى يعجز بعدها ينحرف
عجّز ابو زيد واتعب في مساره عنتره
قامت اوتار المحبّه في محبّتك اتعزف
وايتغنّا كل عرقٍ فيك مما يضمره
المصيبه شمسنا في كل لحظه تنكسف
مير بسراج الهوى نحيا بعينٍ نيّره
كل ما فكّرت شريان الغلا ضاق ونزف
وآتمسّك في هواها واتعلّق بشعره
افتديها في حلاة الروح لو ريقي نشف
واقتطف له من غصون القلب والحب اثمره
آتحمّل وآتأمّل وترجّا واعترف
ان قلبي عاجز وهذا قدره ومحشره
لا تسامح قلبي وتبكي ليامنّه وقف
قلب ما حقّق طموحك قص عرقه واقبره
الديوان قلب ما حقّق طموحك قص عرقه واقبره
al-d1.com