يا صاحبي صاحبك طايح و ينخاك
لعيون هذا الحب اهجم و حايل !!
احمي حبيبك و احفظه دامه يهواك
و هدّ الصعاب و سد درب الرحايل
مادام دون الناس قلبه تمناك !!
و ورد الامل ويّاك اصبح خمايـل !!
وش جاك تزرع له هواجيس وش جاك
و تصير مع وقتــــــه و ليل الهوايـــل
من يوم يومه عاشقك روحه اعطاك
ولا راد غيرك لا محب لا بدايل !!!
لكن خذاك الكبر ضيّعك واعماك
قمت اتغلى و ف جـــــروحه تخايل
صحيح هو مدمنك و الحزن بجفاك !!!
و ( حبّه تعدى حب شـــمّر لحايل ) !!
لكن ورب العرش لو راد ... ينساك !!
و يفتح لغيرك يا هوى البال فايـل
باذكّرك حبّك و اقول حذراك
ولا اتقول باجر عني ماني بقايل !!!
اللي كتبك بليل ف صبحه يمحاك
و يحرق بقايا الحب شعر و رسايل
صون المحبه وخلها وسط عيناك
دام الهوى طاهر و عشق الاصايل
عايد مرزوق العويس - المانيا