ياكثر ماحبّك واعزك واقدرك
وياكثر ماتطعن خفوقي بيدينك
لو كان تسألني وش اللي مصبّرك
بقول قلبك قبل ملحك وزينك
يامير منهو غير قلبي مومّرك
اغليك اكثر من غلا والدينك
عذروبك ان الشك دايم معاشرك
وعذروبي اني صرت كلّي سجينك
شوف وغلاتك لأ !! غلاتك بها شرك
لايدخل الشيطان بيني وبينك
احلف برب البيت ماني بحاقرك
لكن اخاف يهدني دمع عينك
فديت دمعٍ حابسه في محاجرك
وفديت دمعٍ تمسحه في يمينك
وانا على خبرك حبيبي وابشّرك
قابلك في ظلمك وزينك وشينك
ووردك حبّي ولاني مصدّرك
والله على حب الجباري يعينك
وابسهرك حب وغرام وبسهّرك
إلين تشرق شمسنا في جبينك
تعال ابيك شوي قرّب بخبّرك
الله لا يفرق مابيني وبينك