تأكد
بواسطة : سالم علي الشمري
بتاريخ : 2012-10-19 03:04:12
اضيق بساع من كل الخلايق
كما البركان في حزة مهيضه
واذا جاني من سمومك حرايق
كما الوبّال بالقاع العريضه
ألا ياليت بضلوعي .. توايق
وليت إتشوف وشو بالحفيضه
غلاكم ساكنٍ ماله رفايق
بقلبي هو ربيعه هو مقيضه
على طول الثواني والدقايق
غلاكم مالقينا من يجيضه
ولاني من مَحبتك ... امتضايق
عيوني عن مساويكم غضيضه
على اللي تفعله بالحيل رايق
ولاني سامع إعقولٍ مريضه
وإذا صارت ليالينا عوايق
مصير أيامنا تخضر أريضه
وألا ياليت بعض الناس فايق
على شيٍ من أعماقه يغيضه
ولا ظنّي كثير الناس لايق
وإذا لاقوا ليالينا حضيضه
ومهما ضاقت وساع الطرايق
تأكد ... وش نكنَّه بالحفيضه
سالم علي الشمري
[ ما نخون العهد ]
الديوان تأكد
al-d1.com