سوالف صغار
بواسطة : عساف التومي
بتاريخ : 2012-09-08 04:27:14
ياصغَيِره.. واللي يتوه ف بحر عين
كان اكثر اللي... يحفظون المواني
أبحر... وبيدينك عروس وتلاوين
وأنكف... وبيدينك خفوق ومحاني
ياصغَيِره... بدري على الوصل والبين
بدري على قلبك يحب... ويعاني
الحب... ماهو مثل ماأنتي تظنين
لايخدعك زيف القصص... والاغاني
ياصغَيِره.. والحب ورد البساتين
والشوك .. حارس خده القحوياني
قطفه مهره جروح شوك.. وسكاكين
الورد داني... لكن الجرح داني
ياصغَيِره... والشوق رايح بك ل وين
اي الدروب إختار لك... هالاناني
والشوق ميلاد المنافي... وتأبين
موطن تغاريد الفرح... والاماني
يا صغيّره... توتٍ سجد له على تين
وغصنٍ... ركع رمانه الاحمراني
ردي الهوى عن طهرها.. دامك غصين
العشق ريحٍ... مالها قلب حاني
ياصغيّره.. واللي خلق هالشفاتين
من خمر.. وأثمل لثغتك.. وابتلاني
أنك... من أجمل لابسات الفساتين
لكن... انا قلبي مع انسان ثاني
ياصغيّره... لاترسلين... وتدقين
مافيه داع.. ل ماوحشتك.. و كاني
بكره الامنك كبرتي... تقولين
ياشِييين... نزوات الهوى الاولاني
ياآنسه... لاتزعلين.. وتضيقين
منتي صغيره... ياعنود الغواني
شوفي عيون الناس.. بدوٍ مشدين
يتبع عطشهم فيك... برق الاماني
الديوان سوالف صغار
al-d1.com