السؤال أن طرحته وش يقول الضمير
والجواب بطرف فمه يحاك ويدار
تدري العمر حسبه من شهيق وزفير
والنفس لو عطيته للهوا يستدار
والهواء ان شح في مدة يده وش يصير
والمطر لو يشح تموت بعض الثمار
يعني الكل يسأل ماهو بس الفقير
لاتلوم الفقير ان بدل الدار دار
وش يرد الشجر لو يستظــل الكسير
تحت الأغـصان من عقب التعب والنهــار
يمكن يرد ظله بعض حر الهجير
يمكن انه يجبر نظرة الانكسار
يحسب انه يغير بالدقايق مصير
مادري ان الهجير الجوف والجوع نار
فم يابس وجفن ٍ مايبات وسهير
عين غارت نكاده والمحاجر مرار
مبصر ٍ والبصر كل مايمده حسير
ضلع بارز وظهر ٍ منحني وافتقار
قالوا الجوع كافر قلت ماله عشير
مايقدر ضعيف ولاظروف وقرار
مخلب الجوع مايرحم صغير وكبير
عبء خالي توسل يسبق الانهيار
تدري الجوع شر ٍ واي شر مستطير
والعيون البصيره واليدين القصار
ماقنعه الكثير وراضي ٍ باليسير
كنه الذيب تحرث هرولته القفار
كافر ٍ نام وسطك وانت صرت الحصير
كافر ٍ ماتعلم كيف حسن الجوار
لاتطوى يوقظ في حشاك السعير
لاتلوى ولالك من سبيل وفرار
فاغر ٍ فاه صلف ٍ جد مافيه خير
انهزامي ولكنه ليا ثار ثار
حفرة ٍ للهلاك ألا حفاف الشفير
والمصيبه شفا حفره بجرف ٍ هيار
مادري ان الذي يقسم لغيره عسير
مايفكر ولايفهم نقاش وحوار
لاتقضب بحلقك مايفكك ضرير
كيف يرضى وهو اصلا يحب الشجار
غاضب ٍ مايهمه لانبي ونذير
لاغضب والنبي لقم غضبه الحجار
يعصرك لين تسمع في حشاك الصفير
كنها العاصفه تطرق على باب غار
هو كذا الجوع موجع شرس كافر حقير
جوف يصرخ ولالك غير صمته خيار
كم تأوه لحاله كم صرخ مستجير
والسؤال الذي يطرح ولازم يثار
منهو منا قبل ياكل تذكر فقير؟
منهو اطعم فقير وجبر الانكسار ؟