هي الليالي قاصره حب وفراق؟؟!!
يكفي سهر عيني ارق دون سبه
مايحتمل قلبي ألم عشق واشواق
مبطي غرق عاف البحر لا يطبه
تايب عن دروب الهوى وذاق ترياق
عقب الشفا شاف الهوى اللي لعبّه
شاف القمر مشرق ونوره بالاحداق
غزيلٍ سمّى على النار وشبّه
اوقد لهيب الشوق والقلب خفاق
والعين تسرق نظرة العين طبه
سلهم برمشه وانحنى فوق براق
خدٍ تبارق حظ منهو يحبه
في مبسمه لولو غشى العين رقراق
واعذب ينابيع العسل هو مصبه
ليه الليالي قلبت هم مشتاق
ليه الليالي عودت بالمحبه
هو لازم اني اسهر الليل تواق
هو لازم عيون السهر به تنبّه
لو للهوى بين المواليف ميثاق
ما حسّب العاشق عواصف مهبه
وماكنت ابكتب هم نومي بالاوراق
وماكنت ابشكي هالسهر دون سبه
نافع بن طواله