الموت الحمر
بواسطة : تركي مزعل زبن الطوالة
بتاريخ : 2017-08-03 16:13:37
لي صاحبٍ من جملة اصحابي معه طاب السّهر
الـبارحه كـنا ٍ نـسوق مْـن الـسّواليف اجزله
وصـدفـه طـرالـي طـاري ٍ هـيّـضني وْهـاض الفـكـر
ونـاظـرت وإلاّ صـاحـبي سـالـي وقـلـت آبـسئله
ياصاحبي دامك معـي جـالس على نور القـمـر
والـجو هادي وْلا به احـد ٍ يشتكي من مشكله
أبـنشدكْ بالله مافي خـاطرك تسمـع شعـر ؟
قـال إيه ابسمع مـن قصيدك,, قلت حاضر وازهله
ياصـاحـبي هـالعـام هـذا غايبـين بْـلا عــذر
والعـام كـّنا حـاضـرينٍ بالصـفوف الاوله
والعـام جـايـز حـسبته بمْـية سـنه ولاّ شهـر
كل شـي جـايز, والهـدف يا مصعبه يا مسهله
والحـسبه اللي تجمـع الثنـتين درع من الخـطر
لا ضـقت من حـسبة حديـهن يم الاخرى حوّله
في معـمعة أهل البـحر والـبر مـن بـدْو وحـضر
بهـا الشـجاع إليا دخـل للمـعركه فـزّع هله
ومـن طاح من ظـهْر الفـرس معـذور والدنيـا عـبر
والعـبره بْـمن يلتـفت خلفه وينسى المرجله
ولايـذبـح الـفـرّيس إلاّ صـيحة المـوت الحـمر
لا صـاحـت ولبّى الفـداوي بالعُمُر ما طوّله
لـكنّ كــلٍ بالـنهـايـه شـاف وارضـاه القـدر
وكلٍ طلـع من سـاحة المـيـدان عـال المـنزله
هـذا كـلام اللي ليـا منّه حـضـر,, شـعره حـضر
و وان غـاب ، شـعره حاضر ٍ ماغاب كل ٍ يدهله
ياصـاحبي وان كان تفهـم فـي مضـامين الشـعر
جـتْك المـعـاني والمعاني مـن هـجـوسي .. حلّله
الديوان الموت الحمر
al-d1.com