| وش على هم الصدور وضيقته وجروحه ووش على ليل ٍسريته في مغبِّ جْراحـه |
| نبتدي صفحه ونطوي صفحة مشروحـه والجروح اللِّي مـن أَوَّل باقيـه نيَّاحـه |
| وش خذيت وْش بقا ياطفلة المرجوحـه غير همٍ بالضلوع وغيبتـك ورماحـه |
| كم وانا لي كم يانبض الغـلا ياروحـه واعذب حروف الْقصيد بغصنكم صدَّاحه |
| الدُّموع اللَّي تخالط عبرتك مـع نوحـه وين أَبا القى له دوا يادنيتـي والرَّاحـه |
| ليتها بي / بس تعتق ناظرك مسموحـه لو خذت من وسط عيني يالغلا مصباحه |
| فدوة ٍ لك هي وروحي لو غدت مذبوحه بس أَشوفك في حياتك بعدها مرتاحـه |
| أذكر إني قلتها يوم الخفوق وسوحـه!! مودعه بين / اليدين / الناعيه / الذبَّاحـه |
| والا انا ماعاد تفرق جيتـك والروحـه أقصد أنه قد تساوت جيتـه بْمرواحـه |
| أشربي فنجان وصله...لاعدمتي بوحـه واحد ٍ من كثر حبك بسمتـه نزَّاحـه |
| وافتحِي له باب قلبك يرتمي بصروحـه وارسمي حلم السِّنين الموجعه وافراحـه |
| بارك الله في سما البارح وبارق ضوحـه يوم طوَّح في مهب الملهمـه مسباحـه |