أعدّ ما واجهت
بواسطة : عبدالعزيز الرشيد
بتاريخ : 2017-02-11 05:30:17
أنا أعـدّ مـا واجهت ما أعـدّ قول الناس
ولا أعـذرب الطيّب ولا أطـيّـب الخيّب
عرفت الكثير وكثر ماأعرف خذيت قياس
قصير اليدين أكثر مـن يسبّ و يعيّب
قليل الـمـعـرفه نـافـخ الكير لـلجـلاس
غشيمٍ خـدعْه إبليس و إستأسر و غيّب
يحاول يغطي مـا تكاشف من الإفلاس
ردي و رداه أول مـا يـبـداه بـ قـريّـب
نخاه و خذا نفعه و لكن عديم إحساس
ياصعب الوفاء عنده ولو ماهو صعيّب
صباخٍ ما تثمر لـو تطوّق ولا تنداس
ماينفع بها زرع وحمى لو همى صيّب
حسودٍ يسبّ اللي علومه تعلّي الراس
ولا يدري إن سبّه مديحه لاجت طيّب
يسبّ الـمجرّب بالـمواقـف طريح اليأس
و كـلٍ على ما شـبّ بـطـبـوعه يشيّب
عبدالعزيز الرشيد
الديوان أعدّ ما واجهت
al-d1.com