يقولون الوفا غايب وانا قلت الوفا يا طير
حروف اللي قوت تشفي خفوق ٍ ضاق بأحزانه
رسالة صدْق من بنت ٍ بدايتها عساك بخير
رسالة صدْق في وقت ٍ قليل الصدْق عنوانه
بدايتها شكت جرح ٍ يفوق الوصف والتصوير
وخطـّت في نهايتها تقول احذر من فلانه
قريت بحرفها قسوة مبادي ترفض التغيير
وانا من يومها حاير وافكر بأغرب إنسانه
هذيك اللي لها ذكرى تزور القلب والتفكير
هذيك اللي قوت تقتل زمان الهم وطغيانه
كست ذاك الافق بسمه كست ذاك الزمن تنوير
كست ذاك العمر فرحه وحزني ضيّع الوانه
هذيك ان جيت ابوصفها عجزت القا لها تفسير
واضم الروح في حسره وقلبي ثارت اشجانه
فتاة ٍ تكتسح جوي هي الفكره هي التعبير
وغابت والسبب صاحب وشا.. في صاحب وخانه