بيّاع الأماني
بواسطة : سعد الخلاوي
بتاريخ : 2016-02-11 10:42:53
عن علوم بياع الاماني تدور أخبار
وانا من ثلاث شهور اترقب زياره
على الباب ماعندي سوى امنيه واشعار
يرفرف من احلام المساكين نواره
ثلاثين عام الفقر من سابق الاصرار
يعيث بطموحات المقاريد منشاره
وابلغ عليه الامن والامن ياستار
يقيد بلاغي ضد مجهول بإضباره
وعقب اكتشاف النفط مدري وش اللي صار
رياح الضغينه والجفا هب تيّاره
على فرحة المسكين وش زعّل التجار
وهو ماخذا من زادهم شهد لامراره
يحبونهم جوعى مهو حب استحقار
سلامي على ابن الورد عروة وقداره
بغينا مع المرشد علاقات حسن جوار
بلاه التوسع ماتغيّب عن افكاره
عقب ما بزغ شيبي وبانت لي الاسرار
عجزت اتحسف عن ضياعي وتكراره
على فن فك السحر علمني المكار
بقى سحره المعسول مازالت آثاره
يقول قربه نار واقول ماهو نار
اكابر وانا المعزول عن جنة اثماره
اموت بجنونه كل ماهب كا الاعصار
على قلبي قلبي اللي تشكو من اوزاره
جنون الرعيّه حلّه النصح والدينار
جنون الدواعش حلّه السيف والغاره
جنون الصغار تهد ريحه عروش كبار
فديت العيون اليا غمزت خلف نظاره
على جفوني اعبر حلم واذكر ان كانك مار
بإني ثلاث شهور اترقب زياره
سعد الخلاوي
الديوان بيّاع الأماني
al-d1.com