أنا و غيري
بواسطة : عبدالعزيز الرشيد
بتاريخ : 2015-11-05 03:42:52
عليّ تحرم لـقمة الذلّ و الهون
أنا و غيري ما نجي بـ التساوي
مانيب من يقبل على نفسه الدون
على الشرف دايم سريع الخطاوي
عون القريب و عون من دوّر العون
بالفعل ما هي زخرفه بـ الحكاوي
يوم الردي تخلف به ظنون وظنون
ما خـاب من علّق علّي الهقاوي
أعرف مماشييّ و لي قلب و عيون
و عن منهج الوافيين مانيب غاوي
وش عاد لو قالوا ترى ما يطولون
الكفّ خاوي و أيضاً الراس خاوي
واللي يعيدون الحكي لـو يعيدون
ما يبرز الهافي كبار الـمـنـاوي
عندي من اللي صار و يصير مخزون
شاهد عليها ما آخذ أقوال راوي
ولا زلت أقدر راعي الطيب و يمون
ولا زلت للي فات من فعل حاوي
للأولـه راعي و لـه دوم مـمـنـون
و جمايله عندي تفوق الـمـساوي
لكن تحرم لـقمة الذلّ و الهون
أنا و غيري ما نجي بـ التساوي
عبدالعزيز الرشيد
الديوان أنا و غيري
al-d1.com