قروم الضياغم
بواسطة : الشيهانة الضيغمية
بتاريخ : 2015-09-23 14:24:31
سر يا قلم واملي جزيل التواصيف
واختر حروفك من منابت زهرها
فيها المودة والتحايا مراديف
عد الحصا واعداد وابل مطرها
لهل الوفا والجود اهل المواقيف
امجادهم بالكون محدن حصرها
قروم الضياغم فعلهم هول ويخيف
عدوانهم بالسيف تنثر حمَرها
من دور ابن منصور شهوان ومنيف
مجد الضياغم بالشوامخ سطرها
اهل الدلال المعذبات المهاديف
فنجالهن يطرد عوامس كدرها
حلّابةٍ للضيف در المشاعيف
وعلى الصواني جل حيلٍ بثرها
على الاصايل هايفات السراجيف
كم سابقٍ بالكون اخلوا ظهرها
يوم القنا والشلف وحدب المراهيف
يشهد لهم تاريخ مجدٍ شهرها
ياما احتموا خلفات ذود المزاهيف
وتجاولوا من دونها عن خطرها
عيال الضياغم عزوة الجار والضيف
قصيرهم بالعين وحشمة نظرها
الطيب سندا والمراجل عواصيف
وبالخوف يفرق ليلها من قمرها
واليوم ننعم في يسير التكاليف
بديرة هل الشومات طوالن اشبرها
اخوان نورة مثل السحايب مراعيف
الخير مثل السيل وجاري نهَرها
اللي حكموا بالعدل عن جور او حيف
وجنودهم رب الخلايق نصرها
بظل الولي ثم ظل ستر الغطاريف
ابو فهد جيوش المجوسي كسرها
سلمان كف الندى وللوطن ريف
الله يصونه من مصايب دهرها
فعله تشهّل فوق روس المشاريف
لأجل الوطن كل الكلايف قصرها
وصلاة ربي عد نود الهفاهيف
عد الغصون الوارفة مع شجرها
على الرسول الهاشمي زاد تشريف
محمد رسول الله سيّد بشرها
الديوان قروم الضياغم
al-d1.com