خلجات من الوجدان انسكبت على مرافئ الشعور ونسجت من بين الحنايا لتخرج على شكل نص ينبض بروح كاتبتها
روض قلبي من عقب عينك سناوي
من حزن قلبي تصفّق راحتيني
كنت أحسب القلب للغيبات قاوي
لين شفت الحزن ينهش موق عيني
ذا صهيل الشوق بالخفاق داوي
واسرج مهار الشعر حدي وهجيني
ليت قلبك سامعٍ صوت العزاوي
كم نخنتك الروح ياوينك وويني
جف نبعك ليه يالعد الرهاوي
من عقب ما كان عذبه محتويني
ما حسبت حساب قلبك ويش ناوي
لين شلت الجمر في راحة يميني
يا بعد من لبس له بشت حساوي
ويابعد من سار حبه في وتيني
يارفيع القدر يالحر النداوي
رح فمان الله كانك ماتبيني!؟
ما تبعت بدنيتي من كان غاوي
ولا تبعت الا النبي والوالديني
في عيوني تلمح النجم السماوي
ولي شموخٍ بالغٍ بي الفرقديني
لو خوى فكرك فلا فكري بخاوي
بنت عزٍ وبنت صلبٍ مايليني
شابع قلبي وذا الوجدان راوي
من صدوف الدهر دايم تقتفيني
وكاسك اللي علقمه بالحيل كاوي
لابد الايام تلفي بك تجيني!!
#شواهق_نجد