ما هو بكيفي أعشقك صمت وأنساك
وما هو بكيفي أكرهك غصب وأبكيك
الناس لو هي شايفه وش مزاياك
أظنها تبطي تفكّر تخليك !
طيبك .. حنانك .. ضحكتك .. بلسم حكاك
قلبك تبسّامك .. و طبعك يحليك
طبيعتك .. ثقلك ونظرات عيناك
تجبر جميع الخلق تجلس حواليك !
عفويتك سبة مصايب سواياك
تغار منك كل عذراً تِحليك
يحتاج نفحص وش خلاياك ودماك
يمكن خلاياك الحلا والعسل فيك !
أحبّك أكثر من دموعٍ تبّلاك
أحب أبوك و أمك و فوقها أخيك !
عطني شبيهك وأوْعدك ما أتمنّاك
عطني شبيهك وأوْعدك دوم ما أجيك
عايش بدونك في غيَاهيب ذكراك
عايش على دمع وطواريق ترثيك !
عسّاس ليلي والمواويل تنخاك
النحل حالي والتوجّاد يشكيك
أضحك مع هذا وأضحك مع ذاك
ولا مرّت طيوفك أصوّت وأناديك
ماني على بوح الغلا ناوِي بكاك
ناظر عيوني والتفاسير تكفيك !
جيتك وأنا كلي أمل شوفة وفاك
وافي ولكن قَد تخوفًك مِذّييك
لو هي على كثر الوفى طلبة رضاك
لا أزْعل جميع الخلق وأحاول أرضيك !
ما عاد تنفع قولة " أهواك وأبغاك "
ما دام قال : " الوصل ما عاد يمديك " !
لكن طلبتك قبل لا يكمل جفاك
" ذكراي لا مرتْك حذراك تِبكيك " !
وإن مرّ طيفي في عيونك وأشقاك
اسجد لربي واطْلبه وارفع يديك
يا جعل كل الخلق بالضيق تفداك
ويا جعل كل الخلق يا زين تفديك
وأنا .. نسيتك ؟ لا حشى كيف بنساك
تموت فيني والطواريق تِحييك !!
#يوسف_بن_سعيد