كل بطاري الخير يذكر نديمه
وانا اذكره ويثور بي مثل الاعصار
كني غريب وعامل لي جريمه
في قرية ٍمن سلمها بث الاخبار
مالي قرابه والعواقب جسيمه
والخوف دلى بين الاضلاع له كار
اما اني اهرب والنتيجه سليمه
والا اني ابقى واكشف غموض الاسرار
الحق يبغى صيرمي وصتيمه
ومصقل ٍمن صنعت الهند بتار
اسمع وركز يافهيم وفهيمه
موقف وفا ومقابله موقف انكار
الجرح يبقي بالنفوس الكريمة
لوهي تسامح فيه بالنفس تذكار
مثل الدروب المبطيات القديمة
في كف صحصاح ٍخلت منه الأمطار
واثر الجروح اللي تسمى اليمه
تجي من اللي له معزه ومقدار
اللي وجعها بالحشى زاد ضيمه
ياكني اونس بالضماير لهب نار
ليته زرقني بالرماح العديمة
اللي تخلي احمر الدم نثار
ولا ياليته باقي ٍفيه شيمه
ليته تعذر واقبل بكل الأعذار
عجزت افسَر ليه منه الظليمة؟
لايطلبا ًمال ٍولايطلباً ثار
ومعوده سلم العرب و الحشيمه
عين ٍله فراش ٍوعين ٍله دثار
ومدام مامعه النوايا سليمه
يقفي وانا اقفي نكتفي باللذي صار
ابقى على جرح ٍ يتيم وعزيمه
أخير من عيشه ذليله مع العار
ماني متحسف والحسافه هزيمه
اثبت كما يثبت من الحيد سنجار