بحر وغابة
بواسطة : عبدالرحمن جابر الرويلي
بتاريخ : 2015-06-02 18:03:32
(بحر وغابة)
جف الكلام ولا بقى بالحكي ريق !!
حتى الكتابة صار فـيـها گئـــابــه
امعتقن صدري بالاوجاع تعتيق!!
حتِى المشـاعر بالمحـاني مصابـــه
گن السما والقاع فوقي مطابيق
وصار الصدر هم وجحيم وخرابـه،.؟
يروح عني ضيق ويردبي ضيـق
والحزن كـشر وجهـه وغـز نابـه !
واشيب عين اللي همومه مدافيق
يسـري على هـمه وهمه سٓٓـرابه
همن كتـمته دون گــل المخالـيق
ولاحدن سـوا رب الخـلايق درابه
ولا لي سوا حبر وقصيد وطواريق
وانا وجرحــي والألـم والكــــتــابــه
ياخذني الهاجوس غربن وتشريق
ويسج بي مابيـن صفوة ضـبابــه
لاصارت احلامي طوالٍ شواهيق
وبيني وبين الحلم ( بحرٍ وغـابه !!))
أنطر وبيبان الاماني مغاليق
والحلم گم لي واقــف اطـق بابـه
واشوف حلمي في يدين المرازيق
ويظفر بحلــمي واحــــدن م سعا به
(فرحة حلم يرجي من سنين تحقيق
رحبت به فــي صدر كلــه رحــابه)
(وخيبة امل عنوانها( يومي افيق )!
مـن حلم لــيلٍ للحـــقيـــقة تشــــابه)
عبدالرحمن جابر الرويلي
الديوان بحر وغابة
al-d1.com