اظلمت كل الكويت بغيبتك
وانطفت من سفرتك ضيّانها
يابعد قلبي ابتبع سكّتك
وانزل بدار ٍ تعلّا شانها
يوم غابت عن عيوني بسمتك
إختفت من دنيتي ألوانها
يابعد حيي اموت بطلّتك
طلّت القمرا على شطئآنها
والطرب في مسمعي من همستك
اترك العالم واعيش الحانها
فاقدك فاقد حلاوة جلستك
يازهر زيّن شذى بستانها
لو تهيّا والأماني لمسِتك
ماتكرر غيبتك واشجانها
ليتك إتقرر وتعلن رجعتك
للكويت اللي عليك احزانها
وان بغيت بيوم ناتج ردّتك
لك يفوح العطر في امزانها