خابت هقاويه
بواسطة : نايف بن خالد آل الشيخ
بتاريخ : 2015-04-10 16:15:37
قلب(ن) تمنى القرب خابت هقاويه
يا عزتي له ساهر(ن) ما ينامي
عاش العمر وسط الاماني يناديه
وما زاوره يا كود طيف الحلامي
في عز نومه قام شفقان يدعيه
وما جاوبه بالليل غير الظلامي
يرجي سرابٍ بالوهم حيل يظميه
عل و عسى يدرك طريق الهيامي
الدرب ماملت رجوله مماشيه
مير الجسد ما عاد شال العظامي
تمطر دموعه كل ما مر طاريه
مثل الطفل لاجاه سن الفطامي
عقله على قلبه يزيد المشاريه
وقلبه يردد لاتبدد غرامي
الحزن تقرا في عيونه معانيه
يتيم فرح(ن) عن حلومه يحامي
ما عاد به سر(ن) عن الناس يخفيه
كل(ن) درى باللي مضا و كان كامي
كل(ن) يصيبه مير الافراح تخطيه
و كل(ن) درى به مير زاد الملامي
الديوان خابت هقاويه
al-d1.com