إرتجاف السور !

بواسطة : تركي المعيني
بتاريخ : 2015-04-06 01:52:33

[ ارتجاف السور ]

 

يطيح الدمع من غصن الحنين/ ويرتبك عصفور

كفخ ريشه/ وطاحت به عزومه/ وكسرّ جْناحه

 

عجز يرقى على رجم المواعد/ وإنثنى مكسور

وضاق الكون في وجه إنكساره/ وعمّق جْراحه

 

لك الله ياغصن ذبلت على جذعك حكايا زْهور

ومات بتربتك حلمٍ تمرّد صمته وناحه

 

لبسك الحزن وأوراق الخريف تساقطك مشطور

على قاع الوجع وإللي تكاثف جرحه وباحه

 

ذبل صوتي على ضلع انتظاري وإنبلج ديجور

وهذا الصبح في عين المداين شقق وشاحه

 

غدى ثوب اللقا عاري وحلمي راجف ومبتور

وثغر الليل لا نادى الحنين يطيح مصباحه

 

ماعادت شرفة الموعد ترذرذ للملاقى عطور

وجفن الليل من جور المدامع كحلها ساحه

 

غدى وجه الفضاء شاحب وعتّم بي زوايا النور

وأنا اللي داخل أضلاعي أنين يكسّر رْماحه

 

وبقى لحن بقفص صدري يموّل بي إرتجاف السور

على فقد الهديل اللي بكيته وما اطلق سْراحه

 

يطوّح بي على غصن الحنين ويربك العصفور

ويثني عزمه المطلق سماه ويكسر جْناحه !!