الانتظار
بواسطة : محمد العبيوي
بتاريخ : 2012-07-04 16:15:36
الانتظار !! وش تسوي بـ النفوس
كم اكرهك وابغض ثواني مدتك
يـ شين تكة عقربك بإذن الهجوس
دق الفشق اهون وقع من دقتك
ثوانيك كالجيكرة وجه النحوس
ان جيتها لقطع الوصل ما خلتك
ضيفك صبر في مجلسٍ شبه الرموس
كل ما يهز فنجال زدت بـ صبتك
يا كم لـ ظلمك قد تمترست التروس
شعر وكتاب ولا قوينا قتلتك
اجرب طقوسٍ وأزيد بها طقوس
أبغى التهي عن صوت مرعب تكتك
بس قد عرفت من التجارب والدروس
علاج فعالٍ يقزر قعدتك
اذا جلست جنبي غزالٍ عيطموس
سج الهواوي بـ شوفها عن كربتك
سبح خيالي بي ع الطرف النعوس
ومنظر جمال ابرك نظر من فهرتك
كتبت ابياتي وانا فيك محبوس
اهجيك يـ سجان روحي بـ حضرتك
الديوان الانتظار
al-d1.com