جزر القمر
بواسطة : سعد الخلاوي
بتاريخ : 2015-02-24 15:54:52
كانوا بدو واستجد من ذلك امر
مدري من اللي اضاف لكلمة البدو نون
واستشعر الباء في قلبه ليهيب الجمر
الين مات وغدوا عقبه من الفقد دون
جزيرة العرب ويش اخبار جزر القمر
معقول هذا التمادي والطغى والجنون
خليجك اللي بخيره مل ديره غمر
وشلون يقسى وهو موجه كريم وحنون
تعرفهم الطيبين الابرياء السمر
اللي سوا تربتك بالارض مايعرفون
اصيح بك ياخليج وصيحتي تستمر
ويرجع صدى صرختي عقب البكى من تكون
يومن طلبت العمر قالو فداك العمر
تجلدهم بصدّك ومن بعدها يشكرون
اسرا لحبك واذا ذاقوا نقيع الامر
هاموا سكارى غرامك دون مايشعرون
ادري بأنك شجاع ولا تهاب النمر
حتى الاسد ما يريبك لانواك بظنون
لكنك الطيب اللي في مسيره عثر
غدوا عليه الردايا من شامته يضحكون
معقول يابو العدل في ضيعتك تستمر
معقول من مات بك جده يسمى بدون
شكرا انا اللي مدين لحضرتك بالعذر
ظنيتك بلادي انت وكان هذا جنون
سعد زبن الخلاوي
الديوان جزر القمر
al-d1.com