مشاركتي في مزاين القبيله
بواسطة : عبدالله السويدي
بتاريخ : 2015-02-09 14:47:51
يابيوت الشعر هاتي معانيك الجزال
وانتخي لي كل حذره رفيعة منزلا
مابدعناها وحنا على جالٍ هيال
نارد العد الرها نعتلي روس العلا
طامعينٍ فـي بيوتٍ مثل صم الجبال
تتعب الناقد وهو ما لقاله مدخلا
ندرٍ ندحم بها فـ المواقيف الرجال
ندرٍ تتعب درابيل قناص الفلا
وخص مثل اليوم مافيه للصده مجال
اترك اللي لاحضر واجبه يعطي جلا
المقام اللي ينومس يبي مثله مقال
يا بطيب الفعل والا كلامٍ جملا
مرحبا باسم السويدي عدد نشو الخيال
ومن سعى بالحفل باسمه وبسمي مسهلا
فاجتماع قروم ربعي مداغيش العيال
للمزاين بين ذيدانهم قدم الملا
والفعول مزينتهم قبل زين الحلال
جعلها جمعا موده وتقدير وغلا
هم سلايل لاد سواد لاشان المقال
من طمع في ذودهم مكسبه يمسي خلا
سلسلة لاد السويدي على طول الليال
ماحدٍ فرح بدبشهم من عصور البلا
ودامنا ساعة رخا نشكرك ياذوالجلال
ونسألك باسماك يامن تعين المبتلا
تجمع قلوب النشاما حميدين الخصال
مثل تيسيرك تجّماع زينات الحلا
والمديح لحال وعيال ابو وزره لحال
يوم شارو بـ المزاين وللدعم كفلا
مالنا في مدحهم طيب وانا اخو العيال
جعلني من مثلهم ياخواني ما خلا
وربعنا الباقين ياحيّهم مثل الجمال
ينقلون الحمل دايم وللطيب عملا
وان حصل مني زلل ياكريمين السبال
شاش راسي للمطنخ وبالطنخه غلا
اعذرو مثلي تراكم بعيني راس مال
عزوةٍ دايم لكسب النواميس وكلا
عبدالله بن شعيفان السويدي السبيعي
الديوان مشاركتي في مزاين القبيله
al-d1.com