طاح الحطب
بواسطة : عواد بن طواله
بتاريخ : 2014-09-12 09:39:39
احيان تزعل علي ولي عليها عتب
تخطي وتزعل وتاطا القلب باقدامها
وياليتها كل ماتزعل بليا سبب
ترضى وانا اكرر الاعذار قدامها
يوم اكتبك ياقصيدي كنت كلي تعب
ياشين ليله يموت الحلم وايامها
فارقتها في رجب واليوم عدا رجب
مدري بقى فيه امل والا امسح ارقامها
مدام شيخ العرب ويحب بنت العرب
يموت في عينها ويموت بزمامها
صحيح هذا نصيبه والنصيب انكتب
لكن تقطع معاليقه في حسامها
خلاص لعيونها راضي وطاح الحطب
لو شفت وشلون وسط القلب ميسامها
انا ضحيه غلا بنت الحسب والنسب
لوحه جمال وحلا سبحان رسامها
عواد بن طواله
الديوان طاح الحطب
al-d1.com