ودعتكـ الله
بواسطة : حمود الحبيل
بتاريخ : 2014-03-18 04:23:28
عزي لمن همه على القلب بارك
وصفت على صدره هموم ٍ مباريك
في وسط قلبه شبت ام المعارك
بين الغلا وعناد فكر ٍ وتشكيك
ياصاحبي ليت الزمان استجارك
ياليت لو يصدق وينصف ويعطيك
ليته الى منه تردى استشارك
ليته يبري ذمته قبل يدميك
وليته الى منه تمادى وجارك
في ليلة ٍ يرضي شعورك ويرضيك
مره يتوه الفكر ويعمي قرارك
ومره يفز احساس قلبك ويعميك
ليتك قبل تصفق يمينك يسارك
فكرت مره في غرامك ومغليك
ليتك نهيت الوقت ولا افنا عمارك
ورديت وقتك قبل عيني ترديك
عشقت ليلك وانكشف لي نهارك
وانشل فكري يوم باحت خوافيك
غمضت بعيوني وطاح اعتبارك
وكبتك منها يوم عافت مواريك
لومات حبك وان تحطم محارك
وان كنت خاين ماتجاهلت ماضيك
اذكرك طفل ٍ تايه ٍ في مدارك
ريح ٍ تصافق بك وريح ٍ تقديك
علمتك الحب الطهور ومنارك
علمت ذاتك كيف يحكم مباديك
اسأل خفوقك يوم ضاق بفنارك
من علمه يشتاق يدفا ويدفيك
اسأل شعورك في زمان انكسارك
من علم البسمه تلالى بأشافيك
اسأل معاليقك ٍ و همك ونارك
من دخل احساس السعاده محانيك
اسأل زمانك يوم حطم مسارك
منهو اللذي شيد طريق لخطاويك
واليوم في ظهري تصوب عيارك
يالعنبو جدك. وانا اللي مربيك
يامل قلب ٍ كان يعشق ديارك
يتوه نبضه كل ماحل طاريك
يضمى شعوره وان ضميته تدارك
يغوص في جم المشاعر ويسقيك
قلب ٍ وقف جنبك بوقت انهيارك
قلب ٍ تعذب لين طابت لياليك
قلب ٍ رجيته لين عزم وزارك
قلب ٍ تمنيته يحن ويلبيك
قلب ٍ وهمته بالغلا وانكسارك
قلب ٍ عشقته قبل يعشقك ويجيك
انت اللذي جيته. وجبته. لدارك
وكلك امل يلقى وطنه بأراضيك
صدق دموعك يوم خانك وقارك
غره دفا صوته وهزه ترجيك
ودعتك الله دام هذا اختيارك
قلبي له الله وان طعنته بأياديك
ودعت ليلي والسهر وانتظارك
ودعت نشوات الفرح يوم الاقيك
ودامك بغيت احضر زفافك واشارك
بقسى على نفسي واجاملك واجيك
بجيك اتبسم واكابر وابارك
وخوفي يتوه احساس فكري واعزيك
وفر دموعك وش يفيد اعتذارك
يالله عسى خيره وربي يهنيك
ياقلب يالله خان وقتك وجارك
ودع غرامك ذكرياتك وماضيك
صدمه ولكن عدها بأحتقارك
والصدمه الي ماتهدك تقويك
وان صاح نبضك واحترق وسط نارك
قله سعادة من تحبه تكفيك
الديوان ودعتكـ الله
al-d1.com