عطيتك القمرا
بواسطة : محمد العبيوي
بتاريخ : 2012-06-23 22:37:28
ترا الذي سواك حبي وعلاك
ورفعت بك بشعور قلبي علالي
عطيتك القمرا وملكتك افلاك
ومهدت لك وعر الحيا كالسهالي
واهديتك ورود المحبه و الاشواك
أخذتها عنَّــك وأدمت شمالي
وصدري يذري بك عن الهم يحماك
درعٍ تكسربه سيوف الليالي
كنت احسبن الغدر بـ الطبع عداك
واقول مالك بالبشر اي مثالي
وكنت احسبن طيبي ع الطيب رباك
وتشري مثل ما قد شريتك بغالي
حتى تفجر مكمنك عن خفاياك
وسالت مزونك بالردا والخمالي
غرك خفوقٍ بـ الوفا شب ذكراك!!
او غرك انك فايقٍ بـ الجمالي!!
ما همني ولاني من البعد برجاك
وانا الذي طبعه ع العز طالي
ابشر بحول بك مهابيط الادراك
وانزلك بعد العلا بـ السفالي
واحجمك حتى تمناني ارفاك
ويصيب عقلك من عذابي هبالي
توسوس ولحدٍ من الناس يرعاك
وترجع ترجاني من الهجر تالي
واقول لك صبرٍ ترا الشين ما جاك
اللي مضا مع قادمه كنه حالي
بذوقك مرٍ تعكر به شفاك
واعطشك خمسٍ تتابع توالي
وتستصرخ افزعلك وارطبلك لماك
وتطلب براد الماي واسقيك صالي
وبنفث سموم الضيق داخلك تملاك
لا تذبحك ترتاح!! ولا تعيش سالي
ابرهقك يـ طبع جساس وانصاك
محدٍ يزبن يـ بكر بـ القتالي
مشهَّر العزة يبا يجيك يحداك
وهمام حبك بقتله بـ النزالي
كن الندم بـ ستار ليله تغطاك
ضايق وعن ضحكات الايام خالي
ولا اتركك حتى تعدد خطاياك
ثم تعتذر وتقول عفوك مُنى لي
وتقول لي حبي سما بك وسواك
وشالك بعد قدرك بـ وسط السفالي
وقول لك فارق ،، واجرح حناياك
بـ هجرٍ بتر بيد الفرح كل وصالي
هــذي جزاة اللي يسوي سواياك!!
مزقته أقواس الخطا بـ النبالي
الديوان عطيتك القمرا
al-d1.com