آه يا دمع مسحته عن خـــــــــدودك في يديني
ودي أشرب دمعتك وأشيل عـــنك الحزن كله
...
والله إن الدمع كل الدمع ما يطفــــــــي حنيني
ينتهي من دون معلوقي وقلـــــــــــبي ما يبله
...
أحسب دموعك عقب خامس سنه ما تشتهيني
كنت أقول الــــــــدمع لا ضيع طريقة ما يدله
...
يوم ترسل دمعتك وجـــــــــروح قلبك لاتجيني
كل جرح يوجعك .. من شان عيني فــيك خله
...
يا عيون عن عيون الكون كلــــــــه تحتويني
خذ من عيوني لأجل عينك جــــروح مستهله
...
نوب يرضيني عليك ... أنك تعيش الحب فيني
نوب يزعلني عليك انك عــــــــــذابي ما تمله
...
أنت شكلني حبيبي في حيــــــــاتك وش تبيني
وكل جرح في حشا روحي تبيه جروح قل له
...
صاحبي له صورة تختال من قلــــــــبي لعيني
آه يا قربه علـــــــــــى بالي ويا ما أبعد محله
...
ما حصل خلف السلام إلا جـــــروح في كنيني
اشتهي قلـــــــبي يجاملهن ولكن ما حصل له
...
كنت أدور رحـــــــــلة فيها الشقا ما يحتريني
وفي حياتي كن خطواتي على قلـــــــبي مغله
...
يا أنت لو كل المسافة ... والمدى بينك وبيني
لك محل لو يجيني من يجي ما أحـــــــد يحله
عواد بن طواله