تسجيل الدخول

الاكثر أعجابا

عبدالكريم الجباري المعجبين:129
عفاف الشمري المعجبين:95
نافع بن طواله المعجبين:94
بركات الشمري المعجبين:89
علي الضوي المعجبين:82
بندر المطيري المعجبين:82
فرج صباح المعجبين:79
ديم الفيصل المعجبين:77
لافي ذباح المعجبين:76
سعد الخلاوي المعجبين:74
عواد بن طواله المعجبين:73
شواهق نجد المعجبين:71
بدر الحمد المعجبين:68
نبض الحيارى المعجبين:65

الاستفتاء

ماهو تقييمك للموقع
  •  

القائمة البريدية

>> حمـود العجمي >>

بعد ما انتهينا

حمـود العجمي  الكويت

H_ALJ@ أكتب لـ مجرد الكتابه .. بس أنا اوعدك راح تلقى من كتاباتي ما يجوز لك .

2015/12/2210:54 pm
عدد المشاهدات : 2580

بعد ما انتهينا

مقدمه :
 
 
 
اللي توه مفارق .. لا يقرآ : )
 
الفراق شكل من اشكال التواصل .
 
الفراق .. نقطة تحول في حياتك .
 
 
الرجل أحيان يعرف من تعايشه مع الفراق .
 
المفارق .. تاخذه العزه بـ المكابر .
 
 
من عيوب الفراق انك تضطر تتعايش معاه .
 
الفراق مش بالسوء اللي الناس متخيلينه .. والفراق شي سيء .. لكن يذكرك بـ أشياء جميله .
 
ساره .. وفهد .. شخصيتين رئيسيات بس .
 
 
انطلاقا من مبدأ كرهي للمقدمات .. ولأن النهايات أحيان تغنيك عن الموضوع كله .. ما كتبت مقدمه طويله .
 
 
 
يوم أول نهايه ..
 
 
 
الكلام اللي أقوله ... مبتسم
يمكن أكثر شي يوجع بالحياة !
 
بدر السعد *
 
 
يوم غريب .. مزاج غريب .. كل شي ماله اسم او تقسيم .. من أول تفاصيله الين آخره .
صباح باهت .. لا لون لا طعم ..هذا الصباح بدونها .
 
كانت هي أحلا صباح
صوتها .. عصافيره
عيونها .. شمسه .
 
هذا الصباح الرمادي .. كان يوم اول نهايه , كـ انه فارق الماي .. شي نحتاجه عشان نعيش .. لكن لا طعم له ولا لون .
 
كان مؤمن بـ انها  .. مع غلاها عنده , تجي بعد الحاجات الاساسيه بـ هرم ( ماسلوا ) لـ حاجات الانسان .. تخيلوا .
 
مشكلتنا مو بـ فقد الأشياء اللي تعودنا عليها .. لا لا , مشكلتنا بـ فقد تفاصيل صغيره كانت كفيله بـ تحسين مزاجنا لـ باقي اليوم .
 
مثل .. مكالمه الصبح .. و ( صباح الخير ) من صوت الشخص اللي نحبه .
 
بعض الأصوات تكاد تكون لحن لـ أغاني راشد أيام التسعينات .. شي عظيم ومجرد لحن .. لكن يغير مزاجك :)
 
أحيان انثى فوضويه .. ترتب حياة الرجل .. وترتب قلبه .
 
من شفايفها ( صباح الخير ) شكل وطعم ثاني
آه لو تدري وش تسوي صباح الخير فيه !
 
فهد عافت *
 
 
يوم ثاني نهايه ..
 
 
وكنا اثنين ..
تلاقوا حلم !
وصاروا وين ؟
 
 
شادن الخالد *
 
 
ما احد ينكر انه غالبا أسباب المفارق .. ما تسوى .
 
فيه أشياء تزيد الحزن .. بله ,, مثل بعض الأغاني والمطر والغيم .. واشباه احبابنا .
 
فقد العاده يذبح اكثر من فقد المحب وكان هذا الشي واضح عليه .. فعليا واضح على ملامحه .
الهالات السودا اللي تحت العين تجي من السهر .. او قل النوم .. سواء كان هذا السهر لحالك او مع أحد عودك عليه .. وراح .
الليل أقبح من اننا نمدحه .
هي راحت عن طريقه .. بس ما راحت عن باله
كان فعلا مبين عليه انه ماخذته العزه .. بـ المكابر !
 
كان عقله يردد لـ قلبه يومها :
 لا تنكسر قدام عيني وانا اشوف !*
 
من مشاكل الفراق .. شلون ما تكسر خاطر نفسك وانت تسولفه ؟ او حتى لـ صديق عمر اغلا من روحك  .. وتحسه نفسك من كثر ماهو فاهمك .. برضوا مشكله شلون تسولف له فراقك بدون لا ينكسر خاطر نفسك .. عليك .
 
 
أخاف اسولف عن النسيان .. و أذكرها !
 
 
مساعد المطلق *
 
 
يوم ثالث نهايه ..
 
 
يـ اللي تعرفونه .. عطوني دقايق
حبيبي عقب فراقنا .. كيف حاله
 
وشلون عايش ؟حب غيري ؟ تضايق
أمر باله وألا ما أمر باله !
 
بدر بندر *
 
الفراق مو شعور .. حاله تعيشها مع الوقت .. والوقت ما يمر فيه !
 
الفراق هو انك تذكر كل شي .. كل لحظه .. كل وقت .. كل ما سرحت .. او كل ما ركزت بشي .. يطري عليك اللي مفارقه .
 
 
الفراق هو انك بكل اغنيه من أغاني الدنيا .. تذكره.. وتبتسم بسمه يأس .. جميله .
 
( معقوله تفارقنا ) ؟ .. هذا السوال اللي تسأله نفسك الف مره .. باليوم .
 
 
المفارق ممكن يخليك شخص أقوى .. شلون ؟ يكثر حديثك مع نفسك .. ومعروف الانسان ما يبدا ينجح بـ حياته الا لا بدا يسولف مع نفسه كثير .
 
الفراق .. لا عديته .. تقدر تعدي أشيا واجد بالدنيا تظنها اسهل منه .
المفارق مثل العتب .. وبعض أشيائنا الحلوه .. شر لآبد منه .
 
 
على بالي .. تروحين .. وتجين .. وما لـ غيرك بال .
 
نايف العتيبي *
 
 
يوم رابع نهايه ..
 
حين تجد نفسك تفعل أشياء ضد مصلحتك .. فـ اعلم انك وقعت فـ الحب .
 
 
جورج برناند شو *
 
الفراق هو انك تحس انك فارقت روحك .. شلون ؟ الشخص اللي كان يخليك تتقبل نفسك بكل عيوبها .. بكل عنادها ضد مصلحتها .. ضد الظروف .. ما عاد موجود .
 
السوال الأهم : من يعاونك على نفسك ؟ من يطاوعك على قلبك ؟ على مزاجك ؟ منو يخليك تعيش حياتك .. في حياتك .
 
الطفل الي بداخله .. شلون يقنعه انه فارق طفلته !.. شلون وهو ما يحط راسه على الفراش الا لا تطمن انها نامت .
 
غفى .. صوت الشعور اللي يجيبك .
 
فهد كان يؤمن بالاسرار .. لكن بدون صندوق اسود .. كان يردد الفراق مو نهايه العالم .. ساره مو محور الكون .. لكن كان عارف انه صوت المكابر وانه يكذب على نفسه .
 
أكذب عباره سمعتها ( الحب عباره عن شخصين متشابهين ) .. غلط - لأن التشابه بينهم هو نتيجه للحب .
 
محمود درويش يقول :
 
( لا اريد من الحب سوى البدايات )
هذه العباره معناها او تجيب شيين :
بدايات الحب جميله جدا .
الخوف وكل الخوف من النهايات .
 
نقطة عقل :
 
تعلموا انكم تتعلمون من كل شي بحياتكم .. حتى من ابسط الأشياء : على سبيل المثال ( لا التجربه ) .. أشيائك اللي تحبها عود نفسك تنحرم منها .. لأن طال الزمن او قصر .. راح تنحرم منها .
 
جيتي بـ بسمه ورحتي في عنا
يا حياتي .. ليييين ما عادت حياتي .
 
وان تفارقنا .. وتصنعتي الهنا
باقيه في صدرك أعرفها غلاتي !
 
 
حمود *
 
 
يوم خامس نهايه ..
 
أو ( يوم مغيم .. بدونك ) :
 
 
الجو له شغل فـ الإحساس
هالشي انا مجربه والله ..
 
فـ الغيم أسامح جميع الناس
وفـ العج أدور على الزله !
 
سعد علوش *
 
 
نقطة عقل فيها شوية مشاعر: 
لا تفارقون بـ الشتا .. لا تفارقون بـ الشتا .
 
متى يعتبر الفراق فراقين ؟ لا كان الجو غيم .. او جوك مع من تحب .
نسمة هوا .. استثارت فهد .. وتذكر ..
نفس هاليوم .. من سنه واربع أيام و ساعه وربع !
 
كانت ملامحها ذهول
وكنت غيمه من فرح !
 
حمود *
 
كان يوم عظيم للفرحه .. كان يوم مجنون .. كان فعلا من أيام العمر .
كان يوم .. كان : )
 
محادثه :
سألها سؤاله اللي استمر يساله نفسه حتى بعد الفراق .
 
 
فهد : ليش كل مره اشوفك كأني اول مره اشوفك ؟
ساره : يمكن لأن عيونك حلوه .. او تشوفني بطريقه حلوه .
 
عيون الشخص اللي تحب ما تشوفها مثل ما الناس يشوفونها .. لو كله عيوب !! يمكن توصل مرحله أصلا تحب هالعيوب .
عيون الحـب لايمكـن تناظـر ,
عيوب الخل لو هو عيـب كلـه !
 
تماري فيـه وبوصفـه تكابـر ,
ترى من فوق خلـق الله محلـه !
 
 
طلال الرشد - رحمة الله عليه *
 
 
كانت لحن جميل لدرجة انه كل مره يحتار بوصفها كل ما شافها .. واللي جمل لحن احساسها انها غرقانه أغنيات حلوه .. بـ راسها !
مثل مره لما سألها لـ غرض ف قلبه :
فهد : تحبيني ؟
لا شعوريا وبسرعه ردت ساره :
أكثر من اول احبك .. بس م ابغى أقول !
 
نقطة عقل : المفروض اللي يقولك ( أحبك ) ما تستانس .. تسألة لـ متى ؟!
 
حمود *
 
قمة جمال علاقتهم او اجمل ما فيها كان .. انه كاتب مبدع .. وهي ذكيه .
كانوا بسيطين .. حد انك تحسهم معقدين .. وبسيطين جد ان ناسهم يستغربونهم وما يفهمونهم .
كلمة رجل او الشهاده انك رجل .. شي جميل .. لكن لها طعم ثاني .. لا نطقت بـ هالشي للرجل ( أنثى ) .
 
دمعه .. ( قدام الغيم ) عشانه ذكر هاليوم
بـ هالجو .. بـ هالغيم دمعه كان ابسط تفسير لها نهاية هاليوم بـ القصه , وهو بيت حامد زيد :
 
دمعتن ...... كن بـ شقاها يوم طاحت في شليله
جادلن جات بدوي(ن) تطلب الستر .. وسترها .
 
 
 
يوم سادس نهايه ..
 
 
و بـ صوت راشد ..
 
عيت يدي .. على وداعك تهتدي .
 
 
المفارق انسان عادي .. بس مو عادي .
المفارق اكثر انسان ينطق عادي .. بس بعمره ابدا ما كان عادي .
المفارق مفارق روحه .. بس عنده روحه .
المفارق يشوف الصبح ليل .. والليل ليلين !! , ليل الطواري .. وليل , ما ودك يجيك وانت بـ لحالك , ليل الأغاني .
شلون فكر ينسى أنثى .. كانت له أغاني .
المفارق مفارق كل شي .. الا باله .. ومن يطري على باله .
 
يطري عليه الوله .. أطري على باله .
 
 
البدر *
 
أسوء الانتظارات .. انتظار الانتظار .. وأسوء ما بالصدفه المصطنعه .. انتظارها .. كلنا نعرف متى سن اليأس عند المرأه .. لكن سن اليأس للرجل .. اذا عاش انتظار الانتظار .
 
المفارق انسان دنياه معكوسه .. وحتى مشاعره .
 
 
مثل سعد يحيى يوم قال :
 
مو متزن ,
يبكي اذا حس بـ فرح
يضحك اذا حس بـ حزن .
 
 
يوم سابع نهايه :
 
 
جلس شاعر الدنيا .. وخلا الحياة تسير
يبي يشوف كيف تسير من غير خطواته
 
هذا الشاعر اللي عاش عمره على التعبير
وصل مرحله .. زعلان سمعه من سكاته !
 
 
سعد علوش *
 
قعد على مكتبه المعتاد للكتابه .. بس هالمره اول مره من فارق .. قعد يكتب عن شي عاشه وحس بـ آلامه ألم .. ألم .
 
وكان نص كتابته  كـ التالي :
( دايم أسمع " ان أسوء شي ممكن تسويه بحق ذاتك .. انك تعلق امالك على شخص " عرفت ليش او استنتجت ليش .. لآن مافيه شخص ثابت ولآن الأشخاص عباره عن أدوار بحياتك .. مجرد ما يخلص دوره تصفق له .. لكن على هيئه وداع .. وما راح تحسون بقيمة هالكلام الا لما شخص معين يروح عن حياتك .. وتروح معاه آمالك واحلامك وتضطر انك تحاول تبدا حياتك من جديد .. بـ امال واحلام جديده , هذا اذا تشافيت من فراقه .. او تقعد باقي عمرك على امل انه يرجع وتكمل حياتك .. غالبا من راح ما راح يرجع لا تفكر ...
نصيحه أعزائي .. كل الاحلام والآمال ممكن انها تتعوض .. الا "حلم العمر" لذا : لا تربطه بـ أي شخص الا نفسك .. وبهالطريقه لا حققته تكون انتصرت مرتين .. مره على نفسك .. ومره على هقاويك وآمال نفسك ) .
 
وكانت أقصر مده يكتب فيها ! سكر أوراقه ومشى .. بس جرحه لا زال مفتوح .
 
في الليله الظلماء .. ما لـ القمر ضي
وحيييييد .. و أدري عتمة الليل تفجع !
 
كل الحروف البيض ؟ ترجع لها هي !
يمكن مع الأيام .. تقرا وترجع .
 
ثامر الناصر *
 
 
يوم ثامن نهايه :
 
 
مستجدات الحياة وناسها المتغيرين
ما تناسبني واعاني مستجدات الحياة !
 
لست مي *
 
جلس بـ عصر اليوم اللي بعده رتب اقلامه .. رتب أوراقه .. بس قلبه مبعثر !
 
وش يرتب القلب ومشاعره؟ ممكن انثى فوضويه .
ننكر قوة العلاقه بين القهوه والذكريات .. لكن لها علاقه بـ طريقه ما ,, طبعا حنا اغلب الوقت نجحد ذكرياتنا .. بس نحب ونموت بـ طاري القهوه .
 
كل قهوه مجموعة هقاوي .. عاد كل شخص وهقوته , في هقاوي ساده .. في سكر زياده .. في حزن بـ زياده .. أما فهد .. كانت قهوته , أحلام بـ زياده !!
 
 
كان في مناسبه قريبه له .. وكانوا مقررين شـ يسوون فيها وانهم يحتفلون فيها مع بعضهم .. لاحظوا ان اول كلمه بالجمله بـ تكون آخرها بعد .. كان : ) .
وقت العصر كلنا عارفين انه من اسخف أوقات اليوم الا هالاثنين .. كانوا عارفين يستغلونه .. بـ الحب طبعا .. سرح وقعد يتذكر :
 
محادثه :
 
فهد : شنو قهوتك ؟
ساره : عيونك !
فهد : شنو تشربين ؟
ساره : صوتك !
فهد : وبعدين معك يا بنت ؟
ساره : ماااا بعدك بعد .
 
المشكله نفس ما قلت لكم .. كان كاتب وكانت انثى ذكيه .
 
صارحها لحظتها :
 
رغم اني املك كم هايل من الكلمات .. الا اني عندك أعجز اوصفك .. او اوصف شعوري معاك ! لكن الأكيد يمثلني معاك الشاعر عبد الله الكايد يوم قال :
 
الله .. كم تمطر عيونك مفردات من السما ؟!
 
 
وتذكر انه كان يتذكر وقام من مكانه لأشغاله يمكن ينسى ..
 
 
 
خلك منشغل دايم .. ما تفقد احد !
 
 
حمود *
 
 
 
يوم تاسع نهايه ..
 
 
يرد الوقت والتاريخ .. ما رديت /
ثلاث سنين ! أحس بـ شي ما اعرفه !
 
نجي نفس المكان .. بـ فارق التوقيت
ظروف الوقت .. ما خلت لنا صدفه !
 
 
ذروة شعر *
 
قبله لـ كل قلب رجع لـ مكان أول لقى .. لـ كل قلب ؟ يعني هالشي سواه لا اراديا ! ..العقل عدو الفراق الأول .. صحيح يآمرنا بـ أشياء صح .. بس خلونا صريحين .. منو فينا ما جا يوم و عطا قلبه ( وجه ) أكثر من اللازم .
 
وبـ صوووت راشد :
هذه ورده للهوا .. وهذه جروحك .. عطني روحي سيدي
أو خذها روحك !
 
 
وبما ان العاده تذبح أكثر من الحب .. كان مار مكان ( كان ) دايم يمره
طلع له البايع اللي متعود عليه ويعرفه عدل وسأله :
 
 
اليوم ما راح تآخذ ورد ؟؟
 
لحظه : آآآخ .. يا بعض الأساله , تجرح اكثر من أسبابها !!
 
كانت دايم تغني له اغنية راشد .. هذه ورده للهوا ..
 
وكـ ردة فعل كان كل أسبوع بـ يوم ما يحدده لها .. يحط لها بوكيه ورد بـ مكان اغراضها .. عشان تبتسم حتى لو كانوا متزاعلين ..
طبعا كل أسبوع أنواع واشكال والوان من الورد .. الا الأحمر , صحيح انه يعبر عن الحب بس هم ماهم أي اثنين ولا أي ناس !
 
شـ اجاوب ؟
شـ أقوووووووووول ! .. 
طبعا كل ما سبق مر بـ لحظه عليه وجاوب البايع فهد بـ :
 
أنا فارقت الورد !!
 
متخيلين انكم تفارقون الورد ؟ طبعا ما تقدرون صح؟ هذا حاله مع ذكرياتها .. بكل مكان ما صار جميل بعينه لولا وجودها .. وتذكر انه فارق وردة حياته .
 
 
 
يوم عاشر نهايه ..
 
 
سم اللقا صدفه .. وأسميه ميعاد
انا انتظرتك وانت مريت صدفه !
 
فهد المساعد *
 
تذكرون ليل الأغاني ؟
 
بـ ليلة أغاني .. قرر قلبه قرار من ورا عقله نوى يروح لـ مكان ما تدرس .. خلاص ما عاد يحتمل فراقها .. عشر أيام فراق ماهي شويه على قلب شخص حب من قلبه ! ..ما قدر يقاوم بس الأهم انه بـ وقت فراغه ما كان يقعد هناك عشان غيرتها .. درات الدنيا واضطر يروح بـ فراغه , عشان يشوفها !! 
 
وصل كلية العلوم الاجتماعيه وكان لسان حاله يردد :
 
وسط هذا المكان ..... الممتلي تشويش
ضمن زحمة افكاري .. تذكرت تقصيرك !
 
وتسألني ... أكره فكرة الحب بعدك ليش ؟
انا ما عاد لي قلب(ن) لجل ياخذه غيرك !!
 
فهد بن سعود *
 
كان مفكر يقعد بفراغه ويدور شوفها رغم انه قد كتب عن الصدف في كتاباته .. وقتها كل كلماته كانت ( على الجرح ) .
 
هذا هو المضحك المبكي ..
سبحان مغير الأحوال ..
 
اللي من اول علي يشكي ,
اليوم انا اشكي عليه الحال !
 
على ما أذكر لـ سعود بن بندر *
 
 
 
اللي صار صبح ذاك اليوم , يوم ما كان رايح للاجتماعيه .. بالصدفه الراديو كانوا حاطين اغنيه يحبونها ثنينهم .. ( طفله وطفل ) .. وكانت فعلا على الجرح !
 
ما حس بقيمة كتاباته وصدق بعضها الا يومها .. شلون ؟
 
 
 
كمل معاي قرايه : )
 
كان واقف بالعلوم الاجتماعيه .. ونزلت رايحه لـ محاضرتها
.. وفجأه صار اللي وده يصير وما وده يصير .. صادفها .
 
ثانيه عيونهم بـ عيون بعض .. كأنها سنين .. مرت عليهم كل ذكرياتهم !
فهد داخل نفسه :
أنيقه كـ العاده .. بس ليش تحت عيونها سواد !
 
لااااا .. شـ جايبه والجو غيم "( .. كذا كانت دمعتها وهي رايحه محاضرتها !
 
ونهاية هاليوم بـ صوووت نوال :
 
صعب(ن) علي ألقاك .. وانا ما نسيتك ,,
أحساسي كني بين ربعي غريبي .
 
 
يوم 11 نهايه ..
( صدفه )
 
 
تحتضن عيني عيونك بـ وسط الزحام ,
دمعتك .. ضيقت فيني المكان الرحيب !
 
لاااا تقفي ... قبل تلقي علي السلام /
يكبر الجرح .. لا مريت كنك غريب !
 
 
محمد عياف *
 
 
اعيد وأكرر .. الفراق مش بالسوء اللي متخيلينه , حاول كل ما قلبك عورك على ذكرياتك .. تواجهه بـ أيامك الحلوه ..لحظات الجنون .. أيام الحب .
طبعا ساره وفهد .. كان كل يوم من ايامهم حلو وحب , وكانت ايامهم ما يحسبونها بـ نفس أيامنا العاديه .. لا لا .. يحسبونها بـ كم عمر ؟ وكم لهفه ؟ وكم اغنيه ..
 
صدفه : كلمه غريبه .. والأغرب إحساسها !
الصدفه :
ممكن تخليك تبتسم .. ممكن تخليك تبكي بينك وبينك .
الصدف أنواع لكن اقساها .. لـ الشخص اللي ( كان ) معاك .
 
ياخي في صدف انسانيه بعد .. فكروا فيها : )
 
وأجمل اجمل الصدف .. لما تصادف شخص عقلك يحبه .. مثل صديق قديم .
 
الصدف عالم لحالها ... اللي يميزه فيه من القساوه الشي الكثير .
تدري شنو اكثر شي ممكن يقتلك نهائيا بعد الفراق ؟ اذا دريت او حسيت ان اللي مفارقه ماهو مرتاح من بعدك .
 
نرجع لـ فهد ..
 
فز قلبه بعد ما صادفها بعد ما صادفها مو على شانهم ( كانوا ) اغلا ناس بعض ... كثر ما أثر فيه وجود السواد تحت عيونها .
 
شوية بكاها .. ياااا كثره بـ قلبي .
 
من كثر ما اهدي اعصابي .. تلفت اعصابي !*
فهد يسولف مع نفسه :
 
شلون اكسر كل ه المكابر الـ 11 يوم ( اللي مروا كأنهم 11 سنه ) من فراقها .. وأسالها ليه ضايقه !!
مو لازم اعرف شلونها .. بس ليييييه هذا السواد تحت عيونها وانا اللي معلمها ما تبكي !!
 
في ناس يغيبون عن حياتنا .. وحنا نغيب معاهم !! طيب حنا نبينا ترا !
حمود *
 
بـ صوت مجيد :
 
شخبار عينك ؟
بعدها تعشق النجمه !
وقلبك حبيبي .. بعد عمري وش اخباره .
 
شيين ممكن يقتلونك بعد الفراق .. او بالاصح بقايا روحك اللي راحت مع من فارقت ,, الشي الأول او القتله الأولى .. الصدفه بعد الفراق لـ شخص لا انت ولا هو مرتاحين بعد فراقكم لـ بعض ,, الشي الثاني .. أصحاب الفراق الحقيقي .. جاوبوا داخل نفسكم : )
 
 
بـ وداعها .. ضاع الحكي
تسكت .. بـ نظره حانيه !
 
نظراتها .. قبل البكي ؟
بكيه بـ صوره ثانيه !
 
فيصل السور *
 
 
يوم 12 نهايه ..
 
يا علي كلي نهايات من وين ابتدي ؟
 
فهد عافت *
 
 
الشخص اللي تفارقه يمكن ما تكون حبيته أصلا الا لا كان مغير يومك وشكل وقتك .. شلون ؟ مثلا .. فهد : بـ هالقصه .. كان يومه يبدآ بـ : جامعه , دوانيه , نادي .. دوانيه قبل يعرفها .. بعد ما عرفها صار يبدا : يصبح عليها .. يتقهوى ..يداوم عشان يشوفها بعدها يروحون يداومون محاضراتهم ..دوانيه .. يتقهوى صوتها  ..دوانيه .
 
 
الا على طاري البدايه ؟
 
ذات ليلة فراق .. راد البيت بـ طريقه .. بالغلط سمع بالاشاره شخص حاط اغنيه مجيد ( كيف أسيبك ) ؟ .. ولا عادها غلطه بـ هالمطر !! وقعد يتذكر بدايتهم ..
 
الوقت : مغرب هنا !
 
التاريخ : 25 – 5 – ألفين وبدايه ..
 
اللحظه : مطر
 
الحدث :
تحت درج الكليه .. ومع صب المطر كانت تغني لـ صديقتها , ( كيف اسيبك ) .. وكان نآزل من نفس الدرج وفجأه .. وقف .. وقعد هو وقلبه واحساسه العظيم .. وكل شي فيه ساكنين .. يسمعون
المطر يغني وقت ( صب المطر )
 
 
كااانت الضحكه نشيد
وكانت الساعر مطر !
 
وش بـ أقول او ما أعيد :
والله ان صوته .. شعر !
 
حمود*
 
قعد حوالي ربع ساعه .. ما طلع أي صوت ولا تحرك قلبه من مكانه .. عفوا هو من مكانه .
 
شلون وهو يسمع صوت المطر اللي يآسره أساسا .
 
أجمل من الجمال .. وتغني لـ مجيده .. طفله تغني بالمطر , ابدا مو شي او موقف هين على انسان عادي فما بالكم بـ كاتب مبدع .. كان موقف خيالي .. لكن بالواقع .
 
مافيه حب من اول نظره .. في حب من اول موقف .
 
كان له جمهور كبير يتابعون ادق تفاصيله .. وسبحانه , ما خذا قلبه الا طفله ما كانت تدري عن هوا داره , اشعاره , او كتاباته .
 
 
وما وعى من ذكرياته الا على مقطع :
 
( يعذلوني فـ هواكم .. وانتا شايف وعارف
انا مالي سواكم .. يا حسين الوصايف
انتا في كل صرت لي شمس وظلال )
 
طبعا فهد سمع آخر جمله ف باله .. ( كنت لي شمس وظلال ) .
 
 
 
 
 
 
يوم ( الـ لا تفاصيل جديده ) نهايه .. و الأخير :
 
فهد وساره اللي بالقصه ظلوا متفارقين للأبد .. وعلى فكره سبب فراقهم تافه .. دايم أسباب المفارق تافهه !*
 
أعترف اني يوما ما .. – هاليوم قديييييم – اني احتفلت بـ فراق أنثى عظيمه .. خلت مني انسان مبدع وكانت انثى احساسها عظيم لـ درجة ان مرورها بـ حياتي بس .. خلا مني انسان احس بـ ابسط الأشياء اللي محد يحس فيها .. زادت شاعريتي بالأصح لـ مستوى مختلف كنت فيه قبل اعرفها .
 
القصه كانت نوعا ما عباره عن ( مذكرات مفارق ) .
 
الشي الأهم ان الفراق مو سئ دايما لانه لولاه ما حسينا بقيمة ذكرياتنا الحلوه .. ولولاه ما نميز مشاعرنا .. وأحاسيسنا .
 
في ناس تشتاق وتحن لهم .. بس ما ودك يرجعون لـ حياتك .
 
- كل تفاصيل فهد ما عمرها كانت تفاصيلي .
 
- كم فهد وكم ساره بينكم ؟ لكن مو مبين عليهم .
 
- محد يموت من فراق احد .. مهما كان الحب قوي وجميل .
 
- بداية الشك بالعلاقه هي : نهاية البدايه الحلوه .
 
- الكتابه روح .. وأنفاس .. وحياة ! #شطر لي .
 
-  لا تربط الأماكن بـ الشخوص .
 
- القهوه انثى جميله .. بس ما عنها ذكريات .
 
- رعشة الحب أجمل من رعشة البرد .
 
- الحيا نصف الجمال .. وأحيان كله .
 
- جماداتك أولى بالمحبه من ناس متغيرين !
 
- فهد وانا وغيرنا كثير مفارقين ,  مو متضايقين .. عايشين حياتهم من أجمل ما يكون .
 
 
و أخيرا :
 
 
وين رحتي ؟ باقي شوي وأموت
ما قدرت اصبر عن عيونك .. ثواني !
 
أرحمي المشتاق .. خليني أعيش :
يااا حبيبه ؟ هالزمن ماهو زماني !
 
والمكان اللي .. جلسنا به ليالي ؟
صرت أعاني مثله ومثلي يعاني .
 
والحنين اللي بقى بـ لحظة لقانا /
ضاق به ليله .. وضاقت هالمحاني !
 
صرت أشوفك .. بـ الأماكن والزوايا ,
من رسم ( وجهك ) على وجيه المباني ؟!
 
أنتظر صدفه .. اتخليني أشوفك ؟
وانتظاري يشبهك .. قاسي واناني .
 
ضاااع صوتي .. كل ما افكر .. وانا :
صرت استطعم افراقك .. في لساني !
 
انت وينك – يا حبيبي – انت وينك ؟
عدت الدنيا .. وانا واقف مكاني .
 
 
 
 
حمود العجمي *
 
 
أي شي ما نسبته لـ غيري هو لي .. من جمل ومن نقاط عاديه .
 
 
هالقصه ناتج عن اني بعدت عن الكتابه فتره ..
 
الاهداء 
 
لـ أصدقائي ومتابعيني القدامى .. خصوصا بصمت .
 
 
 
ودائما وابدا ابتسموا .. وانتوا تقروني : )

التعليق على القصة
ارسال الى صديق
أبلاغ عن خطأ