اضحك

ياثقيل الدم اضحك
لا تقول بكم .. واضحك
اضحك، الضحكة بلاش
للرجال وللحريم
لليباس وللهشيم
للصقور وللفراش
.. اضحك الضحكة بلاش
***
ياوحيد الهم اضحك
لا طفى صبحك .. وفاض الليل
واضحك
لا نزف جرحك يهون الجرح
واضحك
لا ارتفع قدر الغريب وقل ربحك
اضحك .. الضحكة بلاش
***
كان عندك ذوق ..
اضحك للتعب يرتاح ذوقك
اضحك وشف كيف يصحا وجهك
وتحيى عروقك
اضحك إن ضاقت عليك
اضحك الدنيا تحت رجليك ..
والرزاق فوقك
***
لا تخاف من النصايح والعتب
واضحك بليا سبب
شف قناة المجد واضحك..
قلب الريموت تابع: بيـرق المليون ..
سادات البداوة والترف
أمسيات الشاعر التحفه.. وجمهور التحف
موجز النشرة، عناوين الصحف
قلب الريموت واضحك
اضحك .. الضحكة بلاش..!
***
ياحزين الضحك حاله
أسرع من البرق لمحه واشتعاله
ياحزين الضحك صوت الروح
وانفاسك ظلاله
الحياه أجمل معــاه
العمر أطول من خلاله ..
وان تعثرت بغلاك .. وطال حزنك
صد واضحك
منت أول طفل يبكي قلبه ويضحك خياله!
***
..واضحك .. اضحك ..
لين تنسى ذكرياتك
اضحك ورتب حياتك
اضحك بروحاتك وجياتك
اضحك.. من جنوب احزانك لباقي جهاتك
اضحك فـي كل شي
.. إلا في.....
اضحك .. الضحكه بلاش
واسأل اللي عاش عمره ماضحك
وشلون عــاش!