ياليل خب الجرح

ياليل خب الجرح ياليل خبه

دمعٍ فضحني في ظلامك مخفيه

قلبي رماني بالهوى وسط غبه

واما الغرق والا ان ربي ينجيه

ازعلت لي غالي وقلبي يحبه

ياحسرتي وشلون يرضى واراضيه

طيب ولايزعل علي دون سبه

واثقلت حمله بالعتب والمشاريه

وانا العتب من باب قدر ومحبه

ولولا الغلا ماكان في قلبه ارميه

اقفى وانا موجوع والطب طبه

متى على الله قلب خله يداويه

ما ارضاه دمعي يوم لاجله اصبه

ولا ارضاه قلبي يوم كثرت رجاويه

طاريه جمرٍ في خفوقي يشبه

وشلون ابصبر كل مامر طاريه

وانا القصيد اليا قريته منبه

مافيه جرحٍ داخلي مايصحيه

ليت الهوى ماهز قلبي مهبه

او ليت قلبي ما فقد شوف غاليه

جادل ولا ادري فالغلا من يشبه

لكن صعيبه وصف خلي الاقيه

انا بعد فرقاه فالقلب ضبة

واليا رجع مفتاحها بين أياديه

وان مت قولوا له ترى اخذه ربه

احرمته وصالك وهو ميتٍ فيه

لاتذرف دموعك وسترك تذبه

دمعك بعد فرقاه ماهو بمحييه

وخطوا على قبري قتيل المحبة

عاشق وموته يوم ودعه مغليه

عبدالرحيم معاوض السُّلمي