تمنّيتك

يِبس قلبي تيّباس الشجر يومه تعلّى وطال       

وتبلّل غصْن شوقي بالقهر والصبر فيني سيل       

تمنّيتك معي عقب السنين المظلمه موّال               

أجرّه كل ما ضاق الصدر حزّة سكوت الليل            

وأنادي فالمساء طيفك وأضمّه لين يطيح الشال     

وأحب الراس وأهْديه المشاعر لين يهدّ الحيل       

شبيهي بالصُور يشبه يتيمٍ للحزن خيّال    

يشوف الحب وماله غير يدعي والفراق الخيل

وشبيهي فالكريم ألي جيوبه فاقده لريال

يخاف العالم تشوفه على حاجة وهو ثقيل

مصيبتنا نحب و ندري ان دوم الوصال محال

ونكابر بالمحبه لين ما يدور العمر ويميل

وأنا ماني بمحتال الغلا كان العرب تحتال             

كريمٍ فالمواصل والمفارَق مَ اطلبه وبخيل

قُوي زيزوم وافي ثابت الخطوه وسيع البال           

عفيف النفس صافي بالنوايا فالوغى حِلحيل

غيور القلب ولا عدّيتني أسوى ثلاث رجال

حياوي واهتمامي لا وصفته مثل نهر النيل

أقدّر وقفة الطيب معي وأسكّت العذال                  

وأشيل حمول غيري واعتقاداتي تدّرس جيل         

وليا حبّيت أحب الوافي الذرْب العفيف الدال   

واحَفظه حفظي لنفسي وأقدّم ما يزيد الكيل         

يحول الحول وأنا مثل حالي ما يزين الحال

أعاتب غيبة عيونك عن عيوني بلا تعليل               

مشاريه الفراق ونغمة الضيقه مثل فنجال

يمدّه صبح ذكراك الكريم و صدتك كالهيل            

كتبتك شعْر بحروف الجزاله والشعر قتّال       

يداوي كاتبه حتى تحلّيه الدموع اكليل

ورسمتك رسمة الهاوي على شطّ البحر برمال

وليا ماج البحر كنه يعارض رسمة التمثيل

شكيتك للعرب يوم المحبه ما لها حلال

ولقيت ان النصايح كنها عندي من التضليل

يقولون : إتركه وأنا دموعي تشبه الشلال            

وأجنّب عن سواليف العرب وأصبِر على ما قيل        

أشوفك أبعد من احلامي و أبعد من الآمال             

وأحسّك بين عيني و الهدب لا من بدا التحليل        

وش أقول وتعبت اقول وش باقي بعد منقال   

يموت الحكي في صدري ويسبب ذروة التعطيل

مصيبتنا نحب وندري ان دوم الوصال محال

ونكابر بالمحبه لين ما يدور العمر ويميل

مدام إن الغلا يحتاج له كلمة بعَدها أفعال        

" اجل بُعدي عن دروبك نتيجة تضحية حلحيل“                          

       #يوسف_بن_سعيد