ليل الشتايم

نسى صوت الحبايب لا يناديني وخفت انساه

                   وقلت املى يديهم بالقصايد قبل ينســــــوني

وطيت ارض القصيد وكل زادي دمعتين وآآآه

                   على الله ما حسبت حساب لضيوفٍ تحروني

ابرجع.. لا اببقى واحفر ارضه لين اصافح ماه

                   واسمي وارتوي واسقي ضيوفي لين يرووني

اببني لليتيم احضان أم وللحزين شفاه

                   وابقطف للهوى اجمل ورودي لو تلوموني

ابطعن كل جرح بحرف حتى ينتثر معناه

                   وابدفن اي معنى ينتثر واقول: لمّـــونـي

وابرمي دعوه ل ليل الشتايم واحتري مسراه

                   احب اللي يسبوني واسب اللي يحبوني

وابمشي واعزف ابياتي بلحن ماأحد غناه

                   واخلي من تحدوني وحــدّوني يغنّـــوني

واوصي خطوتي لا مرني شوك الحسد تاطاه

                   ابوصل كل دربي واترك الحساد يشكوني

نجا هذا غرق هذا وصل هذا وهذا تاه

                   نساك فلان وفلان ذكرك...ياناس فكــوني

انا ماهمني لاصار سيلي عارفٍ مجراه

                   ابفرش ضحكتي بعيون كل اللي يمـــرّوني

انا لاني طريق ماحد يصبر على ممشاه

                   ولاني درب اخضر كل من جوني تمشوني

انا اللي عاهدت يمنى المحبه والوفى يمناه

                   متى نوفي واصافح ناس من طبعي ومن لوني

وانا اللي ترسم اقلام الاوادم ضحكته وبكاه

                   عسى تغريهم شفاهي ولايــــدرون بعيــــوني..

قصيدي اكتبه واخفيه وعيون الصقر تقراه

                   ويقرون العصافير التعب والجـــوع وجنوني