ندى

صبّي ندى طهر وجهك في يدين الزهور 
حتى يدوم الصبا ويطول عمر الندى 

للشمس والعشب الاخضر والسما والطيور
بكتب قصيدة واعلّق خافقي في المدى

وابرسم الغيم قارب والفضا بحر نور
والارض مينا عواطف تشتعل وتهدى 

لان الهوى يقتحمني ويتراكم شعور 
واصير صوت وتردّدني عيونك صدى 

ياحرّة انتي جدودك من قديم العصور
ماينتهي فعلهم بين القبايل سدى

للمجد يا الغالية بنوا قلاع وقصور
لطّامة العايل اهل الطيب سمّ العدى

يزورني طيفك الغالي واسافر غرور
باحضان حلمِ قليل احسان ضايع جدى

مابينك وبيني الا خطوتين وحضور 
أجيك كلّي ضلالة وانتظارك هدى

تصير يمّك حدود الأرض نقطة عبور
عمري عشانك ياعمري لو فقدته فدى

تدرين عنّي وانا المنثور بين السطور
مفتوح قلبي ولا والله عرفت الردى

أخاف يقسى زمانك واتهم بالقصور
والاّ التعب لاخنقني قمت اجرّ الحدى

موجوع كنّي عقب كبرت اعدّ الدهور 
طفلٍ خذتـْه بيده شهب السنين وغدى

مسكون فقر وكسر وديون واحساس جور
ابحث عن الما " وطن " والما متى ياندى!

..