وش يبقى لي؟!

يقولون الطيب ماعاد له طاري!
وأنا أقول كل الطيب في قلبه
ذاك الصاحب الغالي
عناوينه ماتعرف غير الصدق
ورجله ماوطت دروب الزيف
كريم وارث طيبه من أجداده
ولا يهونون خواله عزوتي وبكاي
أيا غالي... قلي بربك
لا خلت هالدنيا من حسك
وش يبقى لي!؟
صحيح كثير أشباهك
ولكن قل لي من يسواك؟!
وربك ماملى عيني سواك
من وصوفك الى أفعالك
حكاية تتعب الراوي
وتوصل فيه لبحرك
ويهيم في سما وصفك
ويرجع تايه وحيران
ولايذكر سوى الرحمن
ولاينلام ياهنى أيامي
غلاك قصة تنكتب ولا تمحى
أدونها في أفكاري
غيوم تشبه أحلامي
مطرها غيث يرويني
ويسقي جفاف روحي
ويرضي خافقي الزعلان
من العالم وسود أيامي
أيا صاحبي الغالي
أنا ذاك القدر اللي وقف على بابك
وتشكى لك من سنين ليلها حالك
ورمى همه على متنك وكاد عذالك
أناجيتك ولذت في حماك من أوجاعي
وهلى فيني غلاك وطيبك وحسك العالي
وكل شيء لي أرخصته ولخاطري هالك
وش أجزل لك أيا صاحبي الوافي؟!
ورأس مالي حرف أترنم به لا ضاقت أحوالي!