شوق وشقاوه

لو تنزف ضــلوعك دموع وتحاسيف

                   وتذوب عشق بكاس شوق وشقاوه

أو تنسكب بشـفاتك أشــهى ســواليف

                  أو تـنـثـنـي مـثــل الــندى بالنـقـاوه

ماعدت موسم توت في مطلع الصيف

                 غـصنك مع الأيام عــاف الطــراوه

حـتى إحــتياجي لك خيــال و تخاريف

                  ماصـرت بـعيوني بـذيك الحــلاوه

الطيف كان أجمل من الـواقع الطـيف

                  والواقع إن الكذب أقسى ضــراوه

نهرب من أجواء المدينة الى الريـف

                 ونلقى بجـو الريف نفس القـساوه   

نرجع نقول إشلون أو ليـه أو كـيف ؟

                 أمـا تحــضرنا أو أقــسى البــداوه

حــنا كــذا مــا عـــندنا أي تـصــنـيف

                 ياهـي حـياتــك عـــزف ولا تــلاوه

ياتـزرع الورده أو تـحــارب بـســيف

                و يبقى المهم إشـلون تــاخذ أتــاوه

و إنت بصــراحه مثلهم دون تـحلـيف

                يمـكن عـجـزنا بـالطبـاع انـتـساوه

عــلمتك الطـــيبة و عــلمتني الـزيـف

               و فـهمتك الحـب و فهـمت العـداوه

درستك إن الشــــوق له ألف تعــريف

               وكرامة الجرح ببعض شوق داوه

وإن الجسد مع روح مايصبح ضعيف

              ولا صـارو العــالم ذيـاب إنتــخاوه

وحذرتك صدودي لو إنحـس مـاشيف

              وصبري عليك إجلال ماهو غــباوه

لا يـكون فــي قــلبك لزلاتي إرشــيف

              لني وهــبتك طــهر قــلبي عـــلاوه

جــيتك غــلا مايوصـفه أي توصـيف

             وأثرك سـعيت لملك قــلبي فـــضاوه

جــبرتنــي أرحــل بـلا أدني تكــاليف

             و أقفيت عنك بصمت مفعم هـــداوه

سكنت قلبك ضـيف و أببـتعد ضـيف

             كل العشـم يبــقى إحترام و غــلاوه

(عوسج) شعر وشعور كل المواليف

                وشعار صدق وطيب طهر و نداوه

أهدت ضلوعك قلب من دون تغليف

                و ماحســت بـذاك المكان بـــحفاوه