الجو والقمرا

الجو والقمرا مع العشق والطيف

… والورد والنسمه مع ذكرياتك

وش ظنّك يجيني بعد كل ما شيف

… غير التنهد والسبايب غلاتك

الجو بارد برد عاليه بالصيف

… والقمرا وجهٍ يشبهك في حلاتك

والعشق بلوا مابها اي تحاسيف

… ارثي سنينٍ قبل اعيش بحياتك

والطيف ضيفٍ يسكن بكل تشريف

… وسط الحشا وش عاد والضيف ذاتك

للورد دايم من خدودك تواصيف

… يفخر بها دامه خذا من صفاتك

اشم عطرك والغريبه علي كيف

… حتى النسيم إتعطره من شذاتك

وان جيت للذكرى تجي دون تكليف

… تنسيني الدنيا طراوة شفاتك

والقلب عاف الود عقب المواليف

… وابشرك قلبي مجوّد وصاتك

انشهد اني لو اسافر يم جنيف

… يطري علي زولك وتطري عباتك

عزي لقلبي ما قوى يكتم الحيف

… حياتي وش تسوى حياتي بجفاتك

عزالله ان العشق ما يقتل بسيف

… وعزالله انه لو قتلني فداتك

نافع بن طواله