عز انكساري

يا حزني البارح ويا حزني اليوم

ويا حرّة شعوري وعز إنكساري

ويا لايمي وش هو بعد كثرة اللوم ؟

دام الملامه ما تغيّر قراري

ويللي على باقي رْمضانك تبي تصوم

العيد مقبل وأنت سارق نهاري !

مشغل تفاكيري وجاذب لي هموم

ومشعل خفوقي بالوله والعَباري

كني بكوم وباقي العالم بكوم

وكني بدونك حزن ما هو اختياري

أشفق على شوفك وأفسّر لي حلوم

وأبكي على قلّ الوصل وانفطاري

أدري وصالك صعْب من وقفة القوم

وأدري بإني في هواك انتحاري !

أبعَد من القمرا مع صفّة نجوم

وأقرّب من ذنوبي بوقت اقتداري

وأمَرّ من طعم القهاوي مع قروم

وأحلى من الكيكة ليا جيت ضاري

وأصعَب من أسباب السّهر حزة النوم

وأسهل من حلول الذكي واختباري

وأقسى من شعور الذي ودّه يحوم

وارْأف من ألي شاف هَج الحباري

وأسعد من الأم التي اُرْزقت توم

وأحزن من ألي جاه غدر وشرَاري

وأطيب من ألي ما يبي حبّة خشوم

وأردى من ألي ما يعَرف اعتذاري

وأوفى من ألي بالعتب دايم يشوم

وأخْوَن من ألي ما يحب الطواري

وأكثر ألم مِن مَن بغيته معك دوم

وأقل ألم مِن مَن تخيّرت شاري

وأنا لجل عينك على نيتي زووم

كتبتها لك لجل (يبين اقتداري) !

وأنت أرتح أصلاً المواصَل لها (بوووم)

لكن .. (أحبك) .. اعتبرها شعاااري ✌

#يوسف_بن_سعيد