سريت ليلي

سريت ليلي لجل تقصر مسافاتي

لعل ذكرى عيوني ما تعذبها

وشبيت ناري قهر عقب انكساراتي

وقالت: نجوم الوفى ( هذي عواقبها )

وملت بيوت الحزن كثرة عتاباتي

وشابت مسامع ربوعي من معاتبها

على وليفن لقى ضيقي مع شتاتي

لملم جروحي وعيا لا يطببها

كنه تشكل على ذوقي و خياراتي

وعيا نصيبي يجمعنا ويزين بها

تكلفت عيني دموعي وعباراتي

يومي عرفت الفرح ما هو بجايبها

يا صاحبي عقب بعدك عن مساراتي

ما عدت اميز مشارقها ومغاربها

وما عدت ابين تبسامي وضحكاتي

خايف من الونه بها لا تخربها

كن الليالي تقاوم صيح وناتي

واحاول اصبر وصبري ما يأدبها

وابكيك واشتاقلك واحزن على ذاتي

وتسألني الناس لكن ما اجاوبها

لا يخدعك ثقلي اليا شفت طلاتي

والله بان عيني اليا جيت تطربها

وان جيت صوبك وشفته خيم سكاتي

اخاف لا تطلع الكلمه واعاتبها

ياخي احبك وابيك اكثر من ابياتي

واظن كلمة احبك صعب تعربها

مفهومها ما ابي غيرك مع اوقاتي

لو المزايين تبكي ما اقربها

اقفيت من قبل لا ابين قناعاتي

بينت لك جزء منها ما يبين بها

صارت قلوب الملا كنها جماداتي

تكذب على بعضها وابليس يركبها

ناسٍ تقول اعشقك يا طيب مشقاتي

ونفوسها تكذب وما هي بتحسبها

وناس تحسبها كبيره فالمهماتي 

لين تعرف بان معدنها معيبها

وناس محرومه فقيره صادقه تاتي

تبي خليلن يداويها ويحس بها

تضج فيها الليالي شوق واصواتي

وتنام وهي ما لقت من هو يطيبها

لا تغرك البسمه اليا شفت بسماتي

ولا تحسب حساب ناسٍ ما تراقبها

يا صاحبي اعتذر لا شفت دمعاتي

انا كذا دموع عيني صعب اغيبها

وعشان ابين غلاتك اسمع الآتي

وركز على ابيات شاعر ما يكذبها

كان السهر متعب عيونك من سواتي

عطني سهر عينك و نفذ مطالبها

وان كاني ازعجتك بكثر اتصالاتي

ارقام يوسف (حذاري) لا تشطبها !

يمكن يجي يوم به تحتاج وقفاتي

ويمكن يجي يوم ودك شوف صاحبها !