بلوووك !!

بلوك لأنك دووم تتجاهليني

بلوك ﻷنك ما بغيتي تحنين            

بلوك ﻷنك كارهه ترحميني

بلوك لأنك ما عرفتي تحبين !       

جيتك سليم وحاجتي تحتويني

وأقفيت عنك كل صدري سكاكين

جيتك أبهديلك بقايا سنيني

ما كنت أفكر بإني أضيع سنين !        

شفتك غناتي واعتبرتك زبيني

لو إن خلق الله على وصلي تعين

عيني تسولف لك ليا شفت عيني

وقلبي ليا شافك يأّلف دواوين

عبرت لك عن كل ما بان فيني                           

وأنتي لك الله ليتك ألي تحسين

ما هو بأنا ألي يالغلا تحقريني

أجل أنا لا أرسلت لك ما تردّين ؟!

إذا على زينك ترى مغتنيني

الله أكبر ويش كثر المزايين ..!

مها و ندى وأسماء وبعد ياسميني

عبير وأفنان و منى وشوق ودارين

ساره وأمل مريم هديل وحنيني

يا كثر الأسماء صعبه إنك تعدّين !     

لا توصفين الحب ولا تكذبيني

أنتي لدرب الحب منتي تعرفين

لا يخدعك كل طيب بالمسلميني                  

( البعض ) مسلم بس ما يعرف الدين !                       

يضحك ويهدي مير خافيه شيني                        

وبعض الآوادم فالنوايا { شياطين } !

وألي يجيك ويعترف بالحنيني

لا تتركينه يضرب يسار ويمين

الحب ليلٍ كل ما به يزيني                                

الشوق وحروف المشاعر مضوّين

وكثر التغلي والزعل حاجتيني                       

تحرق جميع الحب من دون بنزين !

والعذْل نارٍ ع المفارق تعيني                                

يعني جميع ألي مضى اقسمه ع اثنين !

نصيحتي يا ليت لو تسمعيني

تعلمي من قبل إنك تحبين          

وأنا كرهتك ! لو نويتي تجيني                           

بلوك مني .. وسوي ألي تسوّين ..!        

#يوسف_بن_سعيد