صمت الكلام

صرخ صمت الكلام الي يبي يطلع لك بكثره                  

وبكى شوقي على بالي كثر ما جابك الطاري     

وتعب صدري وهو يردد: "وش الدبره وش الدبره" ؟!   

وقزاز مرايتي يجاوب: "بع الدبره على الشاري"

ودموع العين لا شافت لها دوره على بكره

تردد: مستحيل انساه لو شانت لي اقداري

تعبت اصبر واقول يبوح بكره أو بعد بكره

ويجي بكره وهو ما باح واخباري هي اخباري

يا سيد احساسي المرهف طيوفك ليلتن قمره

تشتت زحمة افكاري ليا قال المساء ساري

انا الوافي وانا الحساس من صغري بدا عمره

كسبت اعجاب ناسن في الشدايد تاخذ بثاري

وانا الشاعر ولو شعري تبلى وانطفى جمره

ازيد شرارته وانوي على تكميل مشواري

احبك .. واعشقك .. واكره خفوقي يحفر فقبره

واشوف نهايته وانكر وانا خابر وش اخطاري

واحبك حبي لشعري ليا غنى بعد هجره

واحبك كثر ما دندن مع الالحان قيثاري

ابيك تحس في صمتي وصمتي عايفن جهره

وابيك تحس في هرجي ليا صار الوفى داري

وابيك اقرب من ظلالي بعد شمسه تجي ظهره

وابيك ابعد من الهاجوس لا زعزع لي اقراري

حنانك .. تمتمة حكيك .. غناوي حزة السمره                    

وسكوتك .. ترجمة شعرن من الاعماق للقاري          

وتبسامك .. تفاصيل الغنى لا صاحب النظره

وتعقادة حجاجك .. كنها فقرن على الضاري

طبيعي .. م اتزين .. م اتكحل .. ما تحط حمره

جمالك مقتنع بان الجمال اصلا من الباري

وطبيعي .. م اتكلف .. م اتدلع .. ما تبي شهره

عفيف النفس متربي وكل الغيد م اتجاري

يضيق البال لا مني فقدتك يوم به قدره

ويصير الصدق من كثرة سواليف العرب عاري

وليا شفتك .. تحزم خافقي ونوى على فقره

وتجيك دموع شوقي ويستلمها جيش اصراري

يناديك الغلا .. والشوق .. والابيات في غمره

وترد ايامنا البيضاء .. "ترى حزنك معي .. جاري" !

تعبت اصبر واقول تبوح بكره او بعد بكره

ويجي بكره ولا انك بحت واخباري هي اخباري

جعل دربك سعاده واسمع البحه مع الزفره

" بكى شوقي على بالي كثر ما جابك الطاري "