العاشق اللي ما استراح

عاشقك يذرف مدامعة الحزينه

بعد مابرق المفارق معه لاح

داخلة يشبه ضجيجٍ للمدينة

من ثلاث ايام ما حس ارتياح

أنتِ اول من جرى لاجلك حنينه

وانتِ اول من تسبب بالجراح

عقب ما كنتي له اليد الامينه

صرتي اللي تحمل السم الذحاح

عقب جرح العام جيتي تجرحينه

زادت جروحه ومنها الحب طاح

كان حلمة طفل أنتِ تحملينه

وكان حلمه يلبسك احلى وشاح

وكان حلمه يسكنك في وسط عينه

وكان حلمة كل شيٍ لك يزاح

كلها أحلام وأيامه سفينه

والظروف امواج وأعذارك رياح

عقب هذا بالوصل لاتطلبينه

وش يفيد الوصل دام الحب راح

اذكريه ان كان ليلك تسهرينه

واذكريه ان بان في عينك صباح

واذكري بالشعر كم خطت يمينه

يوم شعره بالوفا والحب فاح

وان بغيتي في قصيدة تكتبينه

اكتبيه (( العاشق اللي ما استراح ))

عبدالرحيم معاوض السلمي