ابطيت اقالب

آبطيت آقالب هاجس الفكر طايعه
وافكر بوقت مضى في روايعه

آشوف شي منه ماعاد سرني
يازين وقتٍ فيه الافواه جايعه

الناس مجموعه على الحب والوفا
مافيهم اللي ناشزات طبايعه

قلوبهم وحده وواحد مصابهم
صف بوجه الفقر وآبشع صنايعه

واليوم مغنيهم من الخير خالقي
وقلوبهم من شدة الحزن مايعه

يمشون والدنيا الدنيه تضدهم
ياكثر مايشكي المعنى وجايعه

كلٍ يهيم وماعرف فين وجهته
وكلٍ مضيع من رداته ودايعه

كلٍ تبدل طبعه وحسن سيرته
خلق ٍمشوه فيه الاحقاد شايعه

لاعاد به خير من الناس يرتجى
ولاخير فيمن دينه آبخس بضايعه

حقايق من هولها شيّب الفتى
حتى ولو قارب وسدد ذرايعه

ومصايبٍ تنحاك في حالك الدجى
هذا يكيد وذاك بلواه شايعه

عالم غريب وعشت معهم بغربتي

وكل النفوس ليا دنا الموت بايعه

فيا رب ثبتني على الدين والهدى
ولا حان نزع الروح خفف نزايعه

واغفر ذنوبي يوم تعلم سريرتي
وآنا على النهج القويم وشرايعه

والحقني بخير البريه ونجني
وآمنّي بيوم كثيره روايعه 

شواهق نجد