تخيرت الفراق وجيت في درب الفراق امشيك
          مشيت اصعب دروبك وانت ماتدري على شانك

دخيلك كان سجيت ونسيتك لايجي طاريك
          يااكرم من جروحك في حشاي الا بنسيانك

حبيبي ماتخيرت الفراق الصعب لاجل ارضيك
          ابرضي واقع يعرف خطاي ويجهل ايمانك

صحيح انك حبيبي ياحبيبي بس وش يدريك
          عن اسرار الشمال ان فاح في ريحك وريحانك

سكنتك يوم لكن ودي ابقى كل عمري فيك
          نزلتك بالربيع وزان لي عشبك وريضانك

ونطرت الصيف لاجل الغيث لاجا الصيف مايسقيك
          تموت بك الورود المزهرة وارحل عن اوطانك

ولقيت الصيف زاد بك الندى اللي كنت فيه اغليك
          وطلعت اجمل من ايام الربيع ومالت اغصانك

أنا محتار يوم ارجي فراقي لك ويوم ارجيك
          ابي وصلك واموت بشوفتك وامشي بهجرانك

أنا لامن ذكرتك عن عيون الناس وين اخفيك
          وانا لامن نسيتك وش حياتي عقب نسيانك

أنا صادق الآ من قلت لك مستقبلي ماضيك
          وانا كاذب الى من قلت لك صاحبك ماخانك

وانا عرف ان صوتي لو يداعب مسمعك يكفيك
          وأنا اعرف ان هجري لاهجرتك كل حرمانك

حبيبي حيل ابا قصر معك من شان بس اوفيك
          أنــا بـانـسـاك لـكـن كـل نـسـيـاني على شانك