ليه يرحل .. دمعه !

امها ماتت وهي طفله صغيره 

 ........  ما هتنت تخطف من اللحظات ضمه

تصرخ وصرخاتها كانت مثيره 

 ........  تنتشي في معذب القلب وتغمه

جاهلٍ وش قسمته وشهو مصيره 

 ........  عقب فرقا نور عينه زاد همه

حبها ولحبها كانت جديره 

 ........  وكل اماله تعيش العمر يمه

اتركت له بعضها ينثر عبيره 

 ........  بكل ركنٍ عطرها الساحر يشمه

مع بقاياها اعتزل دنيا حقيره

 ........  واعتزل ناسٍ على فعله تذمه

امرها منذ الطفولة هو يديره  

 ........  ما ترك فرصه تصيح بيوم يمه

حتى شاب وطفلته صارت كبيره 

 ........  مبتدي عمر الشقا الين تمه

اندفن حلمه وهي تسقى المريره 

 ........  المرض يسري وسط جسمه ودمه

تستثير الحزن بجموعٍ غفيره 

 ........  وكل فردٍ يختنق حرفه بفمه

ليه يرحل ولاماني بي فقيره 

 ........  من يشتت وحدتي وقبره يلمه ؟

آه من صدرٍ تحطم من زفيره 

 ........  كل ضلع وكل احساسٍ يزمه

اتركوها مع بقاياها اسيره 

 ........  لا اخو لا اخت لا خاله وعمه

وعشت انا واقع حكايتها بحيره 

 ........  حرفي المنهك بدا عجزه يخمه

ليت نقدر نطفي بقلبك هجيره 

 ........  ونتقاسمها همومٍ حيل جمه

لو  دريتي عن مشاعرنا الكسيره 

 ........  كل منا تروي الدمعات كمه

تختلف لقدار وبنفس الوتيره 

 ........  لا نبت زهر الفرح حزني يطمه

ادعي الله يرحم الحال ويجيره 

 ........  من همومٍ تطوي العمر وتسمه

الرجا به يا عسى بالأمر خيره 

 ........  نعتلي في جنته وتنزاح غمه

ولا هالدنيا ترى فعلٍ حقيره 

 ........    قالها متحدرٍ من راس قمه