الفكر تايه والأحاسيس تحتار

الفكر تايه والأحاسيس تحتار

 ........  تعبت من اقدار حظي العنيده

يمكن وفت لي في ملاقات لخيار

 ........  مثلك وشرواتك وهذا مفيده

دام اتصبح في محياك ما جار

 ........  وقتي وكل ايام عمري سعيده

هيبه ملك منها همومي بتنهار

 ........  تخجل اذا شافتك قلبي تسيده

الله يعينك دامها جروحي اكثار

 ........  لا فاق بي جرحٍ لفيتك تبيده

جنون طفله هامت بقلبك البار

 ........  يشبه جنونك في كتابه قصيده

لا والله الا انثى تمادت بـ لأفكار

 ........  كنها حروفك لانتشت مستبيده

ادحر نوازع طايشه وقت لسحار

 ........  ادعي الثبات ومنهج اهل العقيده

اخشى الغواية عقب ميلات لقدار

 ........  تتراقل اركاني ولاني شديده

يا كثر من طبع التسلط لهم كار

 ........  يدرس مصيرك يبتكر ما يريده

ان ما تبعنا نهجهم عندهم عار

 ........  ولا نسايرهم بنفسٍ بليده

طالع بعيني ظلمهم تارك أثار

 ........  وش عذرهم اهل العقول السديده

غربة وطن اقضي حياتي بالسفار

 ........  معهم جسد والروح برضٍ بعيده

مثل الذي يطرد سرابٍ بالقطار

 ........  يبحث معالم نادراتٍ فريده

ابني الاماني في مساحاتٍ صغار

 ........  اكبر و تبقى بي معاني رشيده

شانت بعيني دنيتي بعد ما صار

 ........  احايل الدنيا ولا مستفيده

انت الوحيد الي ملاقاك لي سار

 ........  واغلا شعورٍ راحلٍ استعيده

عز الله اني لو اكثر بالشعار

 ........  ما بينت سر المحبة الأكيدة

تبقى حروفي وان تعالت لك قصار

 ........  لو غنيت لو لحنت في نشيده

عسى السعادة تغمر القلب والدار

 ........  الي حوا طيبك وعزك يزيده

الله يبارك لك بقدرٍ ومقدار

 ........  والله يعوضني حياةٍ جديده