صباحات الخبر

مابين صبح الخبر .. و إزعاج هالشارع
ـــــــــــــــــــــــــ بابي .. و أنا .. و الحزن .. نتأمّل لعمري

الباب هذا .. يتيم ولا لقى .. قارع ..!
ـــــــــــــــــــــــــ مثله .. مثل قلب ساكن .. في وسط صدري

يا آنسه .. ضيقتي عذرا .. معي فارع
ـــــــــــــــــــــــــ قلّطتها في وسط صدري .. و أنا مدري ..!

و الحين .. شوفي ملامح وجهي الهارع
ـــــــــــــــــــــــــ مالي عذر .. و الزمن مايعرف لـ عذري !

تعبت أصارع غياب الحُب .. و آصارع
ـــــــــــــــــــــــــ حزنٍ كبر .. و إن صغر .. يصغر على كبري

يالله .. أنا الماضي اللي .. ماله مضارع
ـــــــــــــــــــــــــ و أدري .. أنا مبتدأ .. لكن على خبري :

حزين .. و ألبس ثياب الصابر الجارع
ـــــــــــــــــــــــــ وحيد .. مالي رفيق إلا تعب صبري

و الحين .. ماتت يدين الساقي الزارع
ـــــــــــــــــــــــــ يا آنسه .. أقطف الأحزان .. ما أدري ..!!

شوفي .. أنا و الخُبر .. و الباب .. و الشارع
ـــــــــــــــــــــــــ أبكي على عمري اللي .. مالقى عمري ..!