مغريات الحياة

من  مـغـريـات  الـحياة  و قـلـّة  الحيله

                     العيـن  يـا صبرهـا و القلب يـا صبره

مال الزمن  و إعتدل و أنكف على ميله

                     و الحظّ  عـودٍ  يـوصّـيـني على قـبره

عـودٍ غزتـْه الـمـصايب و قصمت  حيله

                     تخنـقـْه لا من  ذكـر مـجهوده  العبره

قام  إيتوجّد على  ماضيه و أصغي له

                     والحزْن مـا ابطأ عنه يا كود من كبره

خالف  هوى النفس ما غرّه  هوى جيله

                     يـغرس ويسقي و قلبه لـلعطاء سبره

و من  قبل  موعد  خرافـه  شـحّـم نخيله

                     كسرة ظهر والظهر يبطي على جبره

شاف  الفرح  قـدْم  عينه  يوخذ  بـ غيله

                   والكون في عينه أصبح كبر راس إبره

ما ذاق عـقـب  الـتّـعـب  لـذّة  محاصيله

                     طايح ولا فاده  الـمـجـهـود و الخبره

ينعي  شـبـابـه  و يـسـتـرسـل مواويله

                     و تلخّص الـلي حصلّه دمـعه و نبره

و كفّيـن مظلوم تـرفـع لا إنتصف  ليله

                     للواحد اللي  بيديه  الحلّ  و الـدبره

يا ويـل  من  ضـامه من  الله ويا  ويـلـه

                     للـوقت  دوره  و  ربّ  البيت  يختبره

ذا وجـد حالي على حالي و وجدي لـه

                     و العين يا صبرها و القلب يا صبره

      عبدالعزيز الرشيد